Ovtâstum staatâi käččee Noah Lyles lii vuáittám almai čyeđe meetter kaččâm Pariisi olympialijn jieijâs ulâttâssáin 9,79.
Jamaikalâš Kishane Thompson poođij nubben já táppái vyeittei vittâ tuháttâduási. Proonsi vuoitij Ovtâstum staatâi Fred Kerley aigijn 9,81.
Taankiärdásâš fiinaal lâi eromâš jiäráskittee, tastko moolân puáttim maŋa kištottâlleehkin iä vistig tiättám, kii sist lâi vuáittám. Esken moolâkamera koveh muštâlii vyeittee. Eromâš lâi meid tot, et puoh käävci finalistid čahhii 12 čuáđááduási siisâ. Majemužžân pááccám jamaikalâš Oblique Seville-uv kaačâi vuálá 10 seekunt ääigi já poođij moolân ääigist 9,91.
Kišto vyeittee Lyles lii ovdil ohtii vuáittám maailmmiäštárvuođâ 100 meetter kištoost já kulmii 200 meetter kištoost. Tokio olympialijn sun vuoitij proonsi 200 meetter kištoost. Ton lasseen suu viestâjuávkku lii vuáittám kuohtii kole 4 x 100 meetter kištoost.
World Athletics mield taat fiinaal lâi historjálâš, tastko vuosmuu tove puoh käävci finalistid kaččii kišto vuálá 10 seekunt loválij pieggânjuolgâdusâi siste. Tääl mietipieggâ lâi ohtâ meetter sekuntist.
– Taat puddâ lii oskomettum! Mun lam nievdâm tágárijd puudâid. Mun muštám, ko ive 2012 muoi viljâinân keijáim lekkâmjuuhlijd já sárnudáim, et muoi manneen olympialáid já vyeitteen, Lyles muštâlij Yle Urheilu sahhiittâlmist.
Käldee:
– Historiallinen ja järjettömän tiukka satasen finaali! Noah Lyles on maailman nopein mies (yle.fi)
Kove: Erik van Leeuwen (bron: Wikipedia) (Wikimedia Commons)