Pegâlmâs brittilâš poprock-bändi Coldplay lii toollâm nelji konsert Helsig olympiastadionist syeinimáánu 27., 28., 30. já 31. peeivi. Algâalgâlâš juurdân bäändist lâi toollâđ konsert tuše 28. peeivi, mut stuorrâ perustume keežild konserteh šoddii-uv nelji. Taat lii vuosmuš tohe ko bändi toolâi konsertijd Suomâst 27 ihán. Neelji konsertist lijjii ohtsis 170 000 kuldâleijed. Olympiastadion lâi jyehi tove pakkâtievâ fanijn.
”Mij lep pisottâllâm meddâl Suomâst 27 ihheed taan räi tondiet ko suomâkielâ lii nuuvt väädis”, čielgij lávloo Chris Martin humoristlávt kuldâleijeidis.
Coldplay-muusikjuávkun kuleh lávloo-pianist Chris Martin, basist Guy Berryman, kitarist Jon Buckland já rumbal Will Champion.
Helsingin Sanomat muštâl, et motomeh ulmuuh lijjii uástám liipuid puoh neelji konsertân. Motomeh vist iä lamaš luhostum finniđ liipuid ollágin, já motomeh iä lamaš uástám liipuid virgálijn siijđoin, já sii liipuh iä lamaškin olmâ liipuh pic kielesliipuh, moigijn ij peessâm siisâ.
Henkjan já Ester Olthuis eelijn Coldplay konsertist 28. peeivi. Suoi muštâlává, et suoi ostijn konsertliipuid jo ihe tassaaš. Talle ko liipuh pottii vyebdimnáál, te nettisijđo nimmurdij, ađai liipuid lâi mottoom muudon väädis finniđ. Suoi luhostuin finniđ liipuid munevyebdim peht tondiet ko suoi finniv Coldplay uđâstiäđáttâs. Ton peht liipuh pottii váhá ovdláhháá vyebdimân ko táváliih liipuh. Suoi muštâlává, et munevyebdim ääigi Helsigân lâi vuávájum tuše ohtâ konsert eidu 28. piäiván, já eres konserteh láá lasettum munevyebdim maŋa. Suoi kirdijn Helsigân Vuáládâhenâmijn eidu Coldplay konsert tiet. Sunnuu mielâst konsert lâi puoh vääivi já kuhes määđhi árvusâš.
Helsingin Sanomat muštâl, et maaŋgah Coldplay-fanih joteh bäändi maŋŋaal pirrâ maailm. Maŋgâsân tehelumos äšši lii-uv bäändi muusik ohtâvuotân šoddâm aalmugijkoskâsâš uápissiähá juávkku. Kuhemuu määđhi lijjii jottáám Meksikost konsertân puáttám fanih.
Henkjan Olthuisân konsertist paasij meid eromâš hävskis mušto. Coldplay ohtân pegâlmâs pittán lii Yellow (ađai Fiskâd). Henkjan Olthuis lâi kárvudâttâm fiskis T-pááiđán, já sun huámmášij, ko suu kove iđestij paifakkist olympiastadion stuorrâ šeermân. Lávloo Chris Martin láávlui: ”All I can say is thanks for coming today, and thank you for dressing in all YELLOW (Puoh maid mun puávtám ettâđ lii takkâ ko tij leppeđ onne puáttám, já takkâ ko tij puohah leppeđ kárvudâttâm FISKÂDÂN)”.
Henkjan já Ester Olthuis muštâlává, et Coldplay toolâi tijmá konsert meid Amsterdamist, mut tien konsert liipuh vuábdojii tállân loopân ko toh pottii vyebdimân. Tien tááhust ij pááccám eres máhđulâšvuotâ ko mađhâšiđ monnii eres enâmân konsert tiet. Helsig lâi ton tááhust šiev muulsâiähtu sunnui já meid tuárvi alda. Sunnuu syemmilâš uápisolmooš ij luhostum finniđ Helsig konsertáid liipu, mut sun luhostui finniđ tom Ateena konsertân, mii tollui ovdil Helsig konsertij syeinimáánu 8. peeivi.
Henkjan Olthuis mielâst Coldplay muusik kiäsut aainâs-uv tondiet, et tot heivee puohahasáid ulmuid. Sun jieš lii suullân 60-ihásâš, mut konserteh kiäsutteh meid muádilovihásijd nuorâ rävisulmuid. Coldplayst sun noomât hävskis peellin tom, et tot lávdástâl eres pegâlmâs bändijgijn, tego korealijn BTS-bändijn. Coldplay ocá ohtsâšpargo eromâšávt tääl uđđâ bändijgijn toin naalijn, et muusik lii uáivildum čuávuváid ahepuolváid.
Kove: Raph_PH (Wikimedia Commons)