Helsiglâš Harri Heliövaara, 35, lii niäljásspeelâ miäštár Wimbledon tennisturnaamist. Heliövaara vuoitij Wimbledon-fiinaal syeinimáánu 13. peeivi Lontoost. Heliövaara paarrân niäljásspeelâst lâi brittilâš Henry Patten. Suoi vuoittijn australialii spelleepaarâ Max Purcell já Jordan Thompson.
Heliövaara já Patten vuoittijn 6–7 (7–9), 7–6 (10–8), 7–6 (11–9). Spellâ aalgij tijme 14:00 páihálii ääigi, já tot piištij masa kulmâ tiijme. Fiinaal lâi sehe Heliövaaran já Pattenân vuosmuš fiinaal Grand Slam -turnaamist.
Vuáitu maŋa Heliövaara lâi uáli jo luholâš, já sun čiärui-uv luhokonjâlijd. ”Taat lii tuođâi oskomettum. Muoi láim lukkušeh, ete vuoitijm, mutâ motomin vuáitun tarbâšuvvoo lukko-uv”, eeđâi Heliövaara Max-vuolgâttâsâst.
Heliövaara já Patten ánsášáin vuáitustis paijeel 770 000 eurod, mast peeli lii Heliövaara uási.
Wimbledon lii maailm puárásumos já enâmustáá áárvustoonnum tennisturnam. Vuosmuš Wimbledon-turnam spellui jo ive 1877 maadâ-Lontoost Wimbledon kaavpuguásist, kost tot spiälloo ain-uv onnáá peeivi.
Käldee:
– Nämä kuvat kertovat kaiken: Wimbledon-mestari Harri Heliövaara murtui onnenkyyneliin – ”Todella tunteellista” (yle.fi)
Kove: Bonoahx (Wikimedia Commons)