Kavjejeijee tivre -oholoppâ uárnejuvvoo kesimáánu 15. já 16. peeivi. Oholoopâ ääigi ulmuuh pyehtih čuávvuđ kavjejeijee tiivrijd kukkániijtost teikâ jieijâs šiljoost tijmepele verd jo-uv lávurduv tâi pasepeeivi. Kavjejeijee tivre -oholoopâ ulmen lii selvâttiđ, magareh kavjejeijee tiivreh kávnojeh eromâšávt kaavpugniijtoin já -šiljoin. Tábáhtume ulmen lii meid movtijdittiđ ulmuid čuávvuđ ovdâmerkkân piäivááloddáid já miäđušijnijd aldapirrâsistis já suojâliđ taid.
Kii peri puáhtá uásálistiđ Kavjejeijee tivre -oholoopân čuávumáin kavjejeijee tiivrijd. Tiäđuh kavjejeijee tiivrij tiileest käibiduvvojeh eromâšávt kaavpugân tâi čuákkipááikán vuáđudum uđđâniijtoin, mut tiivrijd puáhtá čuávvuđ meid luánduniijtost tâi muorâkäärdist. Aiccâmušâid tiivrijn puáhtá almottiđ nettiluámáttuv peht. Luámáttâhân almottuvvojeh peivi, tijmeäigi, eellimpiirâs já almotteijee sehe kavjejeijee tiivreh já toi meeri. Tiivrijd puáhtá almottiđ meid iNaturalist puhelinheiviittâs peht. Jis ij tuubdâ tivrešlaajâid pyereest, te iše finnee Kavjejeijee tivre -oholoopâ Facebook-siijđost, moos puáhtá vuolgâttiđ kuuvijd tiivrijn já koijâdiđ äššitobdein. Polyttajat.fi-siijđost kávnojeh meid koveh 26 táválumos kavjejeijee tiivrest, moh láá kesimáánu pelimuddoost Suomâst joođoost. Kavjejeijee tivre -oholoopâ puátuseh almottuvvojeh kesimáánu loopâst tábáhtume Facebook-siijđost sehe polyttajat.fi-siijđost.
Kavjejeijee tivre -oholoopâ uárnee Suomâ pirâskuávdáá PÖLYKOORDI-haahâ ohtsâšpargoost Suomâ luándusuojâlemlittoin, WWF-pirâsornijduumijn, Luándutieđâlijn kuávdášmuseoin, Suomâ Tivreservijn, Suomâ Piäivááloddááštotkei Servijn, Uusimaa IJP-kuávdáin, Helsig kaavpugáin já Jyväskylä ollâoppâtuvváin.
Käldee:
– Osallistu pölyttäjäviikonloppuun 15.–16.6.2024! (www.polyttajat.fi)
Kove: Atte Oksanen