Koskoho 5.6. cokkânij stuorrâ pyellim Encore Pirâspalvâlusâi ráhtulâšvuotâhaalist Oulu Ruskonselkäst. Tuhháát neljihâšmeetter stuárusâš halli puállái koskoho ehidist, já piäluštemlágádâs lâi časkâdmin pyellim 15 ohtâduvváin. Časkâdempargoin lâi mieldi meid räjikosáttuv helikopter. Monnjâčaskâdem pištá aainâs-uv tuorâstâheehid räi.
Pyellim šoodâi uđđâsistano-ohtâduvâst, kost siäiluttuvvojeh pahvi, nuurrâmpápáreh, tiätutorvopápáreh já tálutuálulastikeh. Ráhtulâšvuotâhalli tuušâi ollásávt, mutâ ulmuuh iä lammâšum pyelimist. Pyelimist šoodâi ennuv suovâ, mii oinui pirrâ Oulu joba luuvij kilomeetterij keččin eidusii pyellimsaajeest. Piäluštemlágádâs adelij ääšist vaarâtiäđáttâs tiervâsvuotân varâlii suovâ tiet já avžui aldakuávluin ässee ulmuid toppâđ laasâid, uuvsâid já áimustittem. Ráhtulâšvuotâhaali puállámsuijâ ij lah vala tiäđust.
Käldeeh:
– Oulussa syttyi palamaan suuri teollisuushalli – rajan helikopteri auttaa sammutustöissä (yle.fi)
– Oulun isoa rakennuspaloa sammutettiin läpi yön – syttymissyyn tutkinta alkaa huomenna (yle.fi)
– Suuri teollisuushalli tuhoutui täysin tulipalossa Oulun Ruskonselällä – sammutustyöt jatkuivat läpi yön (www.kaleva.fi)
– Lähialueen asukkaita kehotettiin sulkemaan ikkunat ja ilmastointi Ruskon palon takia – vaara ohi (www.kaleva.fi)
– Ruskon palopaikalla käryää edelleen, aluetta vartioidaan ainakin viikonlopun yli – Katso video rajuista tuhoista (www.kaleva.fi)
Kove: Jasmina Schreck