Hollywood čaittâleijei áámmátlitto Screen Actors Guild (SAG) áigu servâđ kietâčällei jaaskon, mii aalgij vyesimáánu aalgâst. SAG:ân kuleh suulân 160 000 elleekove- já televisiočaittâleijed. Jasko suijân láá pälkki- já pargoiähtuääših, mut meid tahofiätu kevttim elleekuuvijn. Paijeel tuhháát čaittâleijed vuáláčallii jo kesimáánust reeivâ, mast sij almottii, ete sij liččii valmâšeh algâttiđ jasko. Fáárust lijjii maaŋgah tobdos čaittâleijeeh, tego Meryl Streep, Jennifer Lawrence já Ben Stiller.
Čaittâleijei já kietâčällei jaskoh tárgutteh keevâtlávt tom, ete puoh Hollywood projekteh koskâlduveh. Stuorrâbritannialâš čaittâleijee Brian Cox arvâlij Sky News -kanava sahhiittâlmist, ete jasko sáttá jotkuđ joba taan ive loopân. Sun meid kritisist striimampalvâlus änhisvuođâ: ”Striimampalvâlusâst liihâd ennuv ruttâ, já sij iä haalijd jyehiđ tom ruuđâ čaittâleijeiguin já kietâčälleiguin.” Jasko lii jo tääl koskâldittám maaŋgâid merhâšittee elleekoveprojektijd. NBC News mield Tom Cruise ááigui algâttiđ váháš äigi tassaaš elleekoveteatteráid puáttám čiččâd Mission Impossible -elleekove jotkâuási kuvviimijd, mut jasko tiet toh láá maŋanum. Oppenheimer Lontoo-vuosâeehid sirdui tiijme verd, vâi čaittâleijeeh pyehtih uásálistiđ toos. Jasko sáttá sirded meid Emmy-palhâšumij jyehim.
Áámmátlitoh väätih pyerebijd pargoiävtuid čaittâleijeid já kietâčälleid sehe raijiittâsâid tahofiätu kiävtun, amas tot puáttiđ čaittâleijei já kietâčällei sajan. Stuárráámus uási SAG jesânijn ánsášeh nuuvt uccáá, ete sist ij lah vuoigâdvuotâ puácuvuotâtáhádâsân, mon vyelirääijin láá 26 000 dollar ihepuáđuh. Majemui iivij ääigi ennuv ovdánâm tahofiättu lii meid tovâttâm huolâ. Ovdâmerkkân ohjelmeh tegu ChatGPT pyehtih rähtiđ juonâid hypoteetláid elleekuuvijd tuše toos adelum miärádâsâi vuáđuld. Uhkekovveen lii tot, ete kietâčällee pargo sajan puátá tahofiättu, já elleekove rähteeh kevttih kietâčällee tuše čalluu valmâštâlmân. Kietâčällei áámmátlitto WGA lii iävtuttâm, ete tahofiätu rähtim siskáldâs ij kolgâččii kevttiđ kietâčallui vuáđđun. Kietâčällei lasseen meid čaittâleijein lii huollân, ete tahofiättu váldá sii pargo. Čaittâleijeelito New York -uásáduv jođetteijee Ezra Knight kommentistij ääši čuávuvávt: ”Studioh halijdeh vuoigâdvuođâ kevttiđ muu olgohäämi mottoom pyevtitmist, já ton maŋa toh halijdeh meid vuoigâdvuođâ ávhástâllâđ toin uđđâsist já uđđâsist tahofiätu vievâst – avalávt. Mij halijdep taas raijiittâsâid. Mij vaattâp vuoigâdvuođâ tuhhiittiđ teikâ kieldiđ uđđâsistkevttim.”
Käldeeh:
– Hollywoodin jäihin pannut lakko voi kestää vuoden loppuun, arvioi Successionista tuttu brittinäyttelijä Sky Newsille (www.hs.fi)
– Hollywoodin käsikirjoittajien lakolle osoitetaan tänään tukea pitkin Eurooppaa, myös Suomessa – uhkakuvana on tekoäly (yle.fi)
– Näyttelijät aloittavat lakon Yhdysvalloissa – elokuvatuotannot pysähtyvät (yle.fi)
Kove: D Thory (Pixabay)
maht tääl kiávvá muccdijt já ruokkadijd?