Säämi Grand Prix lii muusikkišto, mii uárnejuvvoo Säämi pessijááh -festivaal uássin. Taan ive kišto uárnejui Kuovdâkiäinust cuáŋuimáánu káávcád peeivi.
Kištoost lijjii kyehti uási: lávlumkišto já juoigâmkišto. Kuábbáá-uv uásist lijjii kuttâ artist tâi juávhu. Jođetteijen kištoost láin Ole Mathis Sara Nedrejord já Agnete Saba. Suoi čielgijn kišto tavesämikielân já tárukielân.
Juoigâmkištoost lávdástii Anders Isak Oskal (Sárá Májjá), Heli Aikio (Piegâ kandâ), Johan Nils Bedar (Ingor Nila), Saara Hermansson (Goeksege), Nils Johan Gaup (Lise Merethe) já Astrid Tuorda (Unnaviellja).
Lávlumkištoost lávdástii Linus Johnsen (Cevzoset hilat), Elin Oskal (Lusa), YungMiqu já Jezebro (Cokka gávtti), Aili (Duostil), Mihka já Andreas (Ále guođe mu) já Máret Áile (Ráhkis hoavda).
Kuábbáá-uv uásist kyehti enâmustáá jienâstum uásálistee peesáin kollefinalân. Juoigâmuásist kollefinalân peesáin Anders Isak Oskal já Saara Hermansson. Lávlumkištoost kollefinalân pessii kyevtis Mihka já Andreas sehe Máret Áile.
Kištoost kullojii jieškote-uvlágáneh sämikielah. Heli Aikio livđui anarâškielân, já juoigâmkištoost kullojii láávdástmeh meiddei juulevsämikielân, maadâsämikielân já tavesämikielân.
Kišto lavluuh kalgeh leđe uđđâseh já toh iä uážu leđe almostittum ovdil. Toh kalgeh leđe čallum oovtâ tâi maaŋgâ sämikielân. Meiddei juoiguuh kalgeh leđe uđđâseh ađai toh iä uážu leđe almostittum ovdil. Ton lasseen toh kalgeh čuávvuđ mottoom juoigâmärbivyevi.
Sehe lávlumuási já juoigâmuási vyeittee uážžu palhâšummeen 20 000 Taažâ ruvnâd. Vyeitteeh uážžuh 50 000 ruuvnâ árvusii stiipeend, moin sij pyehtih orniđ konsert čuávvuváá ive Säämi pessijááh -festivaalist.
Säämi pessijááh -festivaal ääigi juáhhoo meiddei Áillohaš-muusikpalhâšume. Taan ive tom vuoitij čällee, taaiđâr já toimâtteijee Maj-Lis Skaltje. Palhâšume lii Säämi stuárráámus muusikpalhâšume. Vyeittee finnee diplom, taaiđâtyeje, 20 000 Taažâ ruvnâd já kyevti oho paje Lásságámmist.
Käldeeh:
– Sámi beassášmárkanat // Sámi Easter Festival (www.samieasterfestival.com)
– Maj-Lis Skaltje oaččui Áillohaš-bálkkašumi (www.nrk.no)
Kove: Dieter (Pixabay)