Čohčâmáánu loopâst Tuurku ollâopâttuv totkeeh já Eennâmmittedemlágádâs päikkitiätukuávdáš (FGI) testajii Oulankajuuvâ Jäkälämutkast njunošteknologia, moin puáhtá tutkâđ juhâpirrâs nubástusâid hirmâd jotelávt já tárkká.
Juhâpiirâs tutkui droonijguin, jiešráđálávt vyeijee kárbáiguin sehe enâmist jottee robotijguin. Ulmen lâi testađ uđđâ tahojiermi- já autonomiačuávdusijd, moiguin roboteh pyehtih toimâđ jiešráđálávt juhâpirrâsist. Tuurku ollâopâttâh lii ovdedâm vuáháduv.
”Täin ruustigijn láá jieškote-uvlágáneh sensoreh. Jyehi ruustig totká váhá eres ääši teikkâ eres tärkkivuođáin”, muštâl Tuurku ollâopâttuv totkeetuáhtár Linnea Blåfield Ylen.
Blåfield mield Oulankajuuvâst kärttejuvvojii nubástuvvee juhâpiirâs, virdedem já sedimentij kulgâm.
Uđđâ teknologia lii čuuvtij pehtilub ko ärbivuáváliih tutkâmvyevih. Ovdâmerkkân amnâstuv nurâmist ij innig moonâ siämmáá kuhháá ko ovdil, já sensorij tärkkivuotâ lii puáránâm čuuvtij. Blåfield muštâl Ylen, et puáris piergâsijguin ovdâmerkkân virdedemspiekâstuv mittedem piištij ubâ peeivi, mut uđđâ piergâsijguin toos maneh tuše muáddi miinut.
Blåfield kuittâg muštoot, et uđđâ teknologia ij lah vala autonomisâš, peic piergâsijd kalga vala vahtiđ. Taah tutkâmušah Oulankajuuvâst láá teháliih, tastko toh ovtâstitteh njunošteknologia, tahojiermi sehe ärbivuáválii kieddipargo vuovvijn, mii addel täärhib tiäđu juhâpirrâsij tiileest já nubástusâin.
Anarâš aavis muštâlij Blåfield já iärásij tutkâmušâin meiddei moonnâm ive vyesimáánust.
Käldee:
– Robottiarmeija valloitti Oulankajoen Kuusamossa: tekoäly ja droonit tutkivat ilmastonmuutosta (yle.fi)
Kove: Simo Räsänen (CC BY-SA 3.0 / Wikimedia Commons)