Kyehti Frankfurt kirdemkiedi pargee lává jáámmám malarian Saksaast, Frankfurt tiervâsvuotâvirgeomâhâš muštâlij porgemáánu 26. peeivi. Ton lasseen nelji ulmuu láá puáccám taavdân.
Vuossâmuš olmooš jaamij jo syeinimáánu aalgâst, mut jäämmim suijâ selvânij eskin maŋeláá. Nubbe olmooš jaamij porgemáánust. Nelji eres ulmuu, kiäh puáccájii malarian, láá jo peessâm meddâl pyecceiviäsust.
Malarianjuámumeh láá tuođânálásávt šoddâm kirdemmašinist fáárust mađhâšâm čuoškâ peht. Nuuvt lii arvâlâm Saksa aalmuglâš njuámmootaavdâi äššitobdeelágádâs Robert Koch ‑instituut.
Frankfurt kirdemkiädán láá pieijum čuoškâpivduseh. Pivdum čuoškah vuolgâttuvvojeh Belgia trooppisii talhâstiettuu instituutân Antwerpenân geeneetlij iskosij várás, vâi čuoškâi algâpuátimist finnejuvvojeh lasetiäđuh.
Robert Koch ‑instituut mield malaria vuottui kirdemkiedist Saksaast moonnâm tove ive 2023. Nuuvt kočodum kirdemkieddimalaria lii uáli härvinâš malaria njuámmumvyehi malariakuávlui ulguubeln. Oovtâ tutkâmuš mield iivij 1969−2024 Euroopist láá vuottum 145 kirdemkieddimalaria njuámumid, main oovce njuámumid lijjii Saksaast.
Malaria toovât čuođijd tuháttijd jämimijd ivveest, iänáážin Sahara maadâpiälásii Afrikist. Taavdân lii finnimnáál tipšo, já arâdis muddoost kavnum malariast ulmuuh puáráneh táválávt pyereest.
Käldeeh:
− Kaksi Frankfurtin lentoaseman työntekijää kuoli malariaan – hyttysen uskotaan saapuneen lentokoneessa (yle.fi)
− Zwei Tote durch Malaria am Frankfurter Flughafen (www.tagesschau.de)
Kove: Lipso Kozerga (Pixabay), kove raijim: Valtteri Valkeapolku