Aalmugijkoskâsii olympiakomitea (AOK) stivrâ čuákkimistij majebaargâ syeinimáánu 7. peeivi. Čuákkimist soppui eereeb iärrás ive 2030 tälviolympialij šlaajâin já ohjelmist. Stivrâ meridij, ete ovtâstittum čuoigâm ij lah fáárust puáttee tälviolympialijn. Tot meridij meiddei lopâttiđ Ruošâ olympiakomitean kyeskee uásálistemkiäldu.
Ovtâstittum čuoigâm ij teevdi vátámâšâid
Ovtâstittum čuoigâm lii lamaš tälviolympialij šlaaijân jo vuosmui olympialij rääjist, ive 1924 Chamonix’st Ranskaast. Mutâ ive 2030 Ranska niäljádijn tälviolympialijn šlaajâ ij innig oinuu. AOK vuáđuštâl miärádâsâs kyevtináál.
AOK mield šlaajâ ij lah tuárvi piivnoh: ovdebáin neeljijn olympialijn ton pivnohvuotâ lâi puoh ucemus 11 jieškote-uvlágán mittár mield. Pivnohvuođâ mittedeijee mittáreh láá ohtsis 14, já toid kuleh ovdâmerkkân TV-keččeelovoh já aalmugijkoskâsij keččei kiddiistume.
Pivnohvuođâ lasseen šlaajâ kištottâllâm tääsi lii AOK mield liijkás hiäju. Taat kuáská eromâšávt nisonáid. Tastko AOK ij haalijd olympialáid innig tagarijd šlaajâid, main kištotteleh tuše almaah, te tot meridij meddâlistiđ šlaajâ ollásávt.
Ryeššiliih uážžuh uásálistiđ puátteid olympialáid
AOK meddâlistij Ruošâ olympiakomitea (ROK) kištottâllâmkiäldu, mii lâi lamaš vyeimist roovvâdmáánu 12. peeivi 2023 rääjist. AOK vuáđuštâl miärádâs toin naalijn, ete ROK jesânin iä innig lah tagareh ornijdumeh, moh liččii kuávluin, moh kuleh Ukraina olympiakomitea vuálá.
Ryeššiliih peesih uásálistiđ jo ive 2028 kesiolympialáid Ovtâstum staatâi Los Angelesist.
AOK ij ááigu orniđ tábáhtuumijd Ruošâst ige povdiđ Ruošâ staatânjunošijd kištoid. Ruošâ liipu já aalmuglâšlavluu kevttimist meriduvvoo maŋeláá.
AOK mielâst valastellei uásálistem aalmugijkoskâsii kištottâlmân ij koolgâ raijiđ tondiet, ete sii haldâttâs lii uássin suáđist teikâ eres viärjulii tuárust. AOK iätá, ete tot tyemmee ain Ruošâ volliittem Ukrainan.
Vielgis-Ruošâ olympiakomitea siämmáásullâsâš kištottâllâmkiäldu meddâlistui jo vyesimáánust.
Käldeeh:
– Alpes 2030 to be first gender-equal Olympic Winter Games – freeride (ski and snowboard) and synchro9 (figure skating) athletes to debut (www.olympics.com)
– Karu isku Suomelle – yhdistetty putoaa olympialaisista 102 vuoden historian jälkeen (yle.fi)
– IOC provisionally lifts suspension of Russian Olympic Committee – Recommendations to IFs with regard to Russian athletes’ participation no longer applicable (www.olympics.com)
– Venäjä palaa olympialaisiin (www.hs.fi)
Kove: Gzzz (CC BY-SA 4.0, Wikimedia Commons)