Pittáámsämmilii kielâ já kulttuur kuhes­áigásâš paijeen­tuállee Knut Sivertsen lii jáámmám

Pittáámsämmilâš Knut Harry Sivertsen (š. 26.9.1941) jaamij syeinimáánu vuosmuu peeivi 2026 aldaaš ulmuidis kooskâst kuhháá jotkum puácuvuođâ keežild. Návt muštâl jäämmimalmottâs, mii almostui Avisa Nordland ‑aavisist lávurduv. Knut kálgu Toril Sivertsen nonnij tiäđu Taažâ almosradiofinnodâhân.

Knut Sivertsen poorgâi maŋgâlov ihheed pittáámsämmilii kielâ já kulttuur pyerrin oovtâst kálguinis. Näimipaarâ paijeentooláin jo ive 1988 rääjist päikkisajestis Beiarn kieldâst Dållågádden. Tot lii meccileirâ, kulttuurkuávdáš já museo, kost ulmuuh pyehtih uápásmuđ pittáámsämmilii kulttuurân, taiđui já kielân. Kuávdáást lii ovdâmerkkân máhđulâš uáđđiđ lavnjekuáđist.

Dållågádden lasseen Knut já Toril Sivertsen láin fáárust eereeb iärrás pittáámsämmilii Duoddárá Ráffe ‑kulttuurkuávdáá vuáđđudmist, registeristijn pittáámsämmilijd kulttuurärbisoojijd sehe toimáin ton peeleest, ete Taažâ Sämitigge tubdâččii pittáámsämmilijd.

Knut já Toril Sivertsen finnijn pargostis Beiarn kieldâ kulttuurärbipalhâšume ive 2010. Tijmá sunnui mieđettui meid Taažâ kunâgâs ánsumiitaal.

Knut Sivertsen rávásmij siämmáá táálust, kost sun kálguinis aasâi. Sun juuđij vuáđuškoovlâ já jotkâškoovlâ Tronesist Beiarnist já poorgâi elimis ääigi sieminviljâleijen, postâtoimâttuvvâst já tivottuvvâst. Muádlov ihheed tassaaš sun čuoppui puurrâs keežild. Sunjin poođij kuittâg uđđâ puurâs.

Käldeeh:
– Pitesamar (skuvla.info)
– Toril og Knut arbeider for bevaring av samisk kulturarv og kunnskap (www.pitesame.no)
– Ble tildelt Kongens fortjenstmedalje: – Har ikke ord (www.nrk.no)

Kove: Taažâ Sämitigge

Kommenteh

Čääli komment

Čääli komment.
Čääli noomâd teehin.

Luuvâ meid

Uđđâsumos uđđâseh

Anarâškielâ servi vuábdá uđđâ pyevtit­tâsâid 40‑ive juhlestis

Anarâškielâ servi juhlo 40 ive tooimâs majebaargâ skammâmáánu 24. peeivi Anarist. Juhle ohtâvuođâst vuábdojeh uđđâ pyevtittâsah. Vyebdimnáál láá seehah, pääiđih já puttâleh, moid lii...

Sämikielah tarbâšeh dynaamisii kielâkártá

Sämikielâin mij puohah tiettip motomijd faktaid – ovdâmerkkân tom, et puoh sämikielah láá eenâb teikâ ucceeb uhkevuálásiih, já tom, et sämikielâi sárnooh ääsih sehe...

Säminuorâi taaiđâ­tábáhtus uárne­juvvoo Heta škoov­lâst kiđđuv 2027

Jyehi-ihásâš Säminuorâi taaiđâtábáhtus uárnejuvvoo puáttee ive Heta škoovlâst Iänuduvvâst cuáŋuimáánu 29. peeivi. Iänuduv kieldâ tiävdá puáttee ive 150 ihheed, já taaiđâtábáhtus lii uási juhleive...

Tutkâmuš: Lodde­čaasij tipšo­mist lii ävkki, mut tipšo­tooimah tarbâ­šuuččii eenâb

Čäciloddenäälih láá kiäppánâm merhâšitteht Suomâst majemui luuvij iivij ääigi. Helsig ollâopâttuv já Suomâ pirâskuávdáá totkeeh selvâttii, maht loddečaasij tipšom já suojâlem láá vaiguttâm čäcilodde­naalijd...

Sämikielâi tutkâmuš oovdân­puohtui aalmugij­koskâsii sympo­siumist Bodøst

Čiččâd Saami Linguistics Symposium, SAALS7, čokkij sämikielâi totkeid já motomijd eres-uv ucceeblovokielâi äššitobdeid Tave-enâmij ulguubeln-uv Taažâ Bodøn skammâmáánu 4.–5. peeivi. Nord-universitet-ollâopâttuv čokkim ohjelm faalâi...