Máttááttâs- já kulttuurministeriö almostitij jieht miärádâsâs ucceeblovokielâlii lostâmedia torjust pajan 1.5.2025–30.4.2026. Anarâškielâ siärván miärádâs puáttim meerhâš tom puudâ, kuás mij uážžup viijmâg tiettiđ, moin ruuđáin aavis uđđâseh láá čallum já siijđoh láá peividum vyesimáánu rääjist. Vittâ máánu aavis lii faallâm lohheidis luhâmuš tieđehánnáá, suittá-uv taam pargo juátkiđ vâi ij.
Servi lii tiäđust-uv kijttevâš ton finnim ruttâdmist, moin aavis lii šoddâm já juátká ain pargoos. Kuittâg tággáár tieđehánnáávuotâ toovât huolâ ige movtijdit tooimâ oovdedmân. Kuárus puursâ oolâ ij lah pyeri huksiiškyettiđ uđđâ aašijd. Ličij-uv pyereeb, ete ruttâdem puávtáččij uuccâđ jo muuneeld, puátteevuođâ pargo várás ige moonnâm koloid. Talle loostah pastaččii pyerebeht sundáttâllâđ, maid toh pargeh.
Huolâ šadda meid torjuu aavâštmettumvuođâst. Kyehti vuosmuu ive aavisân mieđettui toimâttâs já almostittem várás 60 000 eurod. Taan ive servi uusâi ruuđâ eenâb ko ovdil, mutâ finnij-uv tuše 50 000 eurod. Suijân lii tot, ete ucceeblovokielâi lostâmedia toorjâ lii, kuittâg majemui iivij, mieđettum ihásávt ain 500 000 eurod. Nuuvtpa ko taaijuv occeeh lijjii ohtâ eenâb ko tijmá, te ruttâ toos ferttij valduđ eres occein. Käävci puáris occee juávhust Anarâš aavis ruttâdem kiäppánij prooseentlávt nubben enâmustáá.
Veikâ toorjâ lii-uv uáivildum sehe ruotâkielân, sämikieláid, kärjilkielân, romanikielân já seevvimkielân, te iänááš loostah láá ruotâkielâliih. Ovdâmerkkân taan ive torjuu finnejii aavis lasseen oovce ruotâkielâlâžžâd lostâd. Occei juávhust lijjii vala kyehti ruotâkielâlii occee já ohtâ seevvimkielâlâš occee, moh iä tiävdám iävtuid. Lii čielgâs, ete tááláš summe ij lah tuárvi ubâ toos, ete ruotâkielâlij loostâi lasseen jyehi eres kielâst ličij ohtâ lostâ. Taam kovvee meid tot, ete occeeh, moi koskân miljovnpeeli eurod juohhui, uccii ohtsis paijeel miljovn eurod.
Suomâruátálâš aalmugtigge, mii Sämitige lasseen addel ciälkkámušâs ovdil máttááttâs- já kulttuurministeriö miärádâs, lii-uv aainâs jo kulmii ettâm, ete torjuu mere ferttee lasettiđ. Nuuvt tuođâi ferttee porgâđ. Sumeh, moh taa láá koččâmušâst, láá loppâloopâst staatân uáli jo uceh, mutâ ucceeblovokieláid toh láá mielâttes teháliih. Kielâ jieijâs media addel kielâsiärvusân jieijâs jienâ já vyevi muštâliđ jieijâs aašijn meid staatâ kanavai ulguubeln. Uđđâ kevttimpiirâs nanosmit kielâ kevttim já eromâšávt luuhâm- já čäällimtááiđu.
Ohtân čuávdusin taid čuolmáid ličij fastâ ruttâdem lostâtooimâ várás. Tom puávtáččii finniđ aainâs-uv puoh ucemuuh kielah. Tágáráin ruttâdmáin taah kielâsiärvuseh puávtáččii ovdediđ mediakulttuuris meritiätulávt.
Kove: Valtteri Valkeapolku