Jieŋâskiärrujuávkku Florida Panthers lii vuáittám Edmonton Oilers ive 2025 Stanley Cup -finalist 4–2. Kuuđâd spellâ spellui Sunrise kaavpugist Floridast koskokkoiiđeed Suomâ ääigi. Tot nuuvâi 5–1. Speelâ sáŋgárin lâi kanadalâš volliitteijee Sam Reinhart, kote čooskij nelji moolâ.
Taat lii Panthers nubbe miäštárvuotâ. Juávkku vuoitij Stanley Cup vuosmuu keerdi moonnâm paje, kuás ton vuástá lâi talle-uv Edmonton Oilers. Talle loppâpuáđus lâi 4–3. Panthers lii lamaš tääl kulmii maŋaluvâi finalist. Paje 2022–2023 tot táppái Vegas Golden Knights -juávkun 4–1.
Florida Panthersist láá nelji syemmilii spellee: kapteen Alexander Barkov, volliitteijeeh Anton Lundell já Eetu Luostarinen sehe piälušteijee Niko Mikkola. Juávhu iševälmejeijen lii oovdiš NHL-spellee Tuomo Ruutu.
Moonnâm ive lâi vuosmuš kerdi, ko NHL Stanley Cup vuáittá juávkku, mast lii syemmilâš kapteen. Ton áánsust Barkov meid väljejui Ive valastâllen (Yle).
Kuuđâd spellâ
Panthers algâttij kuuđâd speelâ pehtilávt. Vuálá viiđâ miinut maŋa Reinhart rievvij skiäru Oilers čuovjisviijve alne, puáibildij Oilers piälušteijei kooskâst já čooskij skiäru moolân. Vuosmuu uási loopâst Matthew Tkachuk paajij 2–0-moolâ. Sun finnij skiäru skipárijnis Luostarisiist já Lundellist.
Nube uási loopâst skiärru koolpâi Oilers moolâvaavtâ peht Barkovân, kiän paccâm vist koolpâi moolân Reinhart peht. Panthers lâi njunošist 3–0.
Oilers koolgâi lonottiđ moolâvaavtâs lasespellei jo talle ko kuálmád uásist lâi vala čiččâm minuttid spellâmäigi, vâi tot puávtáččij tassiđ speelâ. Panthers lâi kuittâg liijkás nanos. Forgâ Barkov adelij skiäru Reinhartân, kote čooskij skiäru kuárus moolân. Miinut maŋa Reinhart piejâi skiäru kuárus moolân vala uđđâsist. Sun finnij skiäru Carter Verhaeghest, kote lâi fáárust meiddei kyevti ovdebáá moolâst.
Sam Reinhart paajij ohtsis čiččâm moollâd Oilers vuástá. Toiguin sun, Wayne Gretzky já Mike Bossy láá áinooh spelleeh, kiäh láá pááččám čiččâm moollâđ oovtâ fiinaalrááiđust.
Ko speelâst lijjii tuše vittâ miinut spelâhánnáá, te Oilers finnij oovtâ moolâ. Panthers juhleh lijjii kuittâg jo joođoost, ige Oilers pastam koskâlduttiđ taid. Forgâ kapteen Barkov uážui kaggâđ Stanley Cup -pookaal nube tove.
Eres speelah
Oilers vuoitij vuosmuu speelâ 4–3 jotkâuásist jieijâs päikkihaalist. Nubbe spellâ piištij nube jotkâuási räi, kuás Panthers viijmâg čoovdij tom 4–5. Talle ráiđu sirdâšui Floridan.
Panthers vuoitij kuálmád speelâ čielgâsávt 6–1. Oilers kuittâg tassij rááiđu, ko tot vuoitij niäljád speelâ 4–5 jotkâuásist. Siämmást ráiđu sirdâšui oppeet Edmontonân. Tobbeen Panthers vaaldij läävhi aldeláá miäštárvuođâ, ko tot vuoitij viiđâd speelâ 2–5.
Käldeeh:
– Reinhart scores 4, Panthers top Oilers in Game 6 to repeat as Stanley Cup champions (www.nhl.com)
– Florida on jälleen NHL:n mestari – Sam Reinhartilta uskomaton neljän maalin ilta (yle.fi)
Kove: NASA Kennedy Space Center / NASA/Cory S Huston (Wikimedia Commons)