Sämmilij tuotâvuotâ- já sovâdâttâmkomissio sierânâsčielgiittâs ”Sämmilij kielâlii assimilaatio, piergiittâllâm já uđâsmem proseseh Suomâst” almostuvá vyesimáánu 23. peeivi tijme 10–12 Teams-tilálâšvuođâst. Tom lii čáállám Annika Pasanen, kote parga sämmilii sosiolingvistiik professorin Säämi ollâškoovlâst Taažâ peln.
Čielgiittâs kieđâvuš Suomâst sarnum sämikielâi tááláá tile já puátteevuođâ. Puoh Suomâst sarnum sämikielah láá uhkevuálásiih. Anarâškielâ, nuorttâlâškielâ já orjâlâškielâ sárnojeh siärváduvâin, moi stuárudâh, lavdâm já historjáliih mudoh iäráneh nubijnis. 1900-lovo ääigi tábáhtum kielâmolsom sämikielâst suomâkielân vaaikut korrâsávt kielâi tááláá tilán tast huolâhánnáá, et majemui luuvij iivij láá aktiivlávt olášittum jieškote-uvlágáneh kielâiäláskittemtooimah já kielâpooliitliih ovdedemtooimah.
Suomâst sarnum sämikielâi eellimvyeimi nanodem váátá pehtilis já pišteváá kielâvuávám. Čielgiittâs kieđâvuš sämikielâlij siärváduvâi kielâmolsomhistorjá já tagarijd almonijd, moh vaikutteh sämikielâi tááláá tilán. Ton lasseen tot čielgee tom, magareh ääših láá kuávdášliih kielâi eellimvuáimálâšvuođâ tááhust.
Čielgiittâsâst kieđâvuššojeh meiddei sämikielâi sirdum perruin, kielâi eellimvyeimi sämmilij päikkikuávlust já ton ulguubeln, stáđásub kielâvuávám tárbu, arâšoddâdem, máttááttâs, sämikielâlij palvâlusâi puátteevuotâ já orjâlâškielâ ovdánem jieškote-uvlágánij staatâi kuávlust.
Loopâst oovdânpuáhtojeh kielâpooliitliih vyevih, moiguin sämikielâi eellimvyeimi puáhtá lasettiđ.
Liŋkkâ almostittemtilálâšvuotân kávnoo Sämmilij tuotâvuotâ- já sovâdâttâmkomissio nettisiijđoin.
Käldee:
– Save the date | Vuorkkii peivimere 23.5. tme 10-12, Teams (sdtsk.fi)
Kove: Sämitigge