KalPa lii vuáittám jieŋâskiäru suomâmiäštárvuođâ jiäráskittee kuuđâd fiinaalspeelâ maŋa Lappeenrantast. Ive 1929 vuáđudum KalPa vuástá jieŋâ alne lâi lappeenrantalâš Saimaan Pallo ađai SaiPa. KalPa vuoitij fiinaalrááiđu 4–2. Taat lii vuossâmuš suomâmiäštárvuotâ kuopiolii juávkun.
KalPa ličij puáhtám čuávdiđ miäštárvuođâ jo vástuppeeivi Kuopiost, mut SaiPa lâi talle pyereeb. Lávurduv KalPa vuoitij fiinaalrááiđu kuuđâd speelâ 2–3 Lappeenrantast, já tienuuvt tot peesâi juhlođ miäštárvuođâ. Čuávdus poođij eskin jotkâuásist talle ko Filip Westerlund čooskij skiäru moolân. Eidusâš spellâmäigi lâi nuuhâm numerijgijn 2–2, ko KalPa lâi tassim speelâ tuše muáddi miinuut ovdil speelâ loopâ.
Taan ive jieŋâskiäru SM-liiga fiinaalráiđu lii lamaš historjálâš, tastko kuohtuuh juávhuh láá Nuorttâ-Suomâst. Moonnâm keerdi SM-kolle moonâi Nuorttâ-Suomân ive 1928, ko Viipurin reipas vuoitij tom.
Taan paje SaiPa välmejeijen lii lamaš legendaarlâš Raimo ”Raipe” Helminen, kote lii pegâlmâs olmooš jieŋâskiärrumaailmist. SaiPast lii lamaš eromâš pyeri paje, já Helminen lii finnim juávhu ovdániđ pyereest. SaiPa ij lamaš ovdil kuássin spellâm finalist. Tot lâi tuše vuáittám oovtâ proonsi ive 1966. KalPa vist lâi jo lamaš finalist kuohtii iivij 1991 já 2017, mut táppái kuohtuin. Kyevti silbâmiitaal lasseen KalPa vuoitij oovtâ proonsi ive 2009. Tot lii meiddei vuáittám vuáđuspellâmrááiđu ohtii ive 2012.
Käldeeh:
– Mikä mahdollistaa KalPan ylivoiman? Teemu Hartikainen ja Topi Nättinen avaavat – ”Jopa todella harvinaista Suomessa” (yle.fi)
– Jääkiekon SM-sarja ja SM-liiga vuosi vuodelta (records.finhockey.fi)
Kove: JuhoJu (Wikimedia Commons)