Ive 2025 Euroviisuh-lávlumkišto stuorrâ fiinaal uárnejuvvoo Basel St. Jakobshallest lávurduv vyesimáánu 17. peeivi. Semifinaleh uárnejuvvojeh majebaargâ 13. já tuorâstuv 15. peeivi. Sveeici almosradiofinnodâh SRG SSR já Euroop almosradiolitto EBU láá valjim Basel 69. lávlumkišto išedin. St. Jakobshallen čäähih 12 400 olmožid.
Euroviisuh-lávlumkišto máccá ton šoddâmsajan
Sveicci tooimâi vuosmuu Euroviisuh-lávlumkišto išedin já meid vuoitij tom Luganost ive 1956. Tot lii taan räi meid áinoo kišto, mast kištottâlleeh kolgii lávluđ kyehti pitá oovtâ sajan.
Lys Assia vuoitij ranskakielâlijn pittáin Refrain. Taat laavlâ lâi klassisâš chanson-stijlâsâš laavlâ, mii muurâšt lávloo nuorâvuođâ rähisvuođâid. Tast ij lah tiätu, maht suu nubbe pittá, saksakielâlâš Das alte Karussell, piergij. Tuámáreh iä kuássin muštâlâm ton čuággáid.
Sveeici nubbe vuáittu poođij Dublinist ive 1988. Talle viehâ tubdâmettum kanadalâš lávloo Céline Dion vuoitij Euroviisuh-lávlumkišto. Jienâstem lâi jiäráskittee, tastko Dion vuoitij Ovtâstum kunâgâskode Scott Fitzgerald tuše ovttáin čuággáin balladijnis Ne partez pas sans moi. Taat vuáittu lâi merhâšittee lävkki Dionân toos, et sun šoodâi tobdosin meid almugijkoskâsávt. Suu pittá lii vááimu tevdee ballad rähisvuođâst já aaibâšmist.
Ton maŋa piištij 36 ihheed ovdilgo SGR SSR kaavnâi kuálmád vuáittupittáás: Nemo vuoitij Malmö 2024 eurovisio pitáinis The Code, mii muštâl mainâs ij-binäärlii identiteet tuhhitmist.
Käldee:
– Eurovision Song Contest šleđgâpostâlisto (30.8.2024)
Kove: Birgit Böllinger (Pixabay)