Aanaar Pride uárnejui lávurduv kesimáinu 29. peeivi 2024 Anarist. Talle ”Rähisvuotâ!” kullui masa ubâ Aanaar markkânist. Aanaar nuorâistivrâ NuVa lii ornim tábáhtus jo kuálmád keerdi.
Tijme 12.30–13.00 ivnááš juávkku čokkânij Sämimuseo Siida šiiljon. Ulmuuh puohtii jieijâs Pride-liipuid já koolbâid, mutâ Siida šiljoost lijjii kevttimnáál meiddei moonnâm iivij koolbah. Tábáhtus aalgij ráiđuväzzimáin tijme 13.00. Ráiđu juuđij Aanaar markkân peht Sajosân. ”Inari, Aanaar, oro mijjân pyerrin!” já maaŋgah eres čuorviistuvah kullojii, ko arvetävgiulmui já olmoošvuogâdvuotâaktivistij juávkku vaazij markkân čoođâ. Aanaar Pride ráiđuväzzim juávkku feerij vuosmuu keerdi Pride-vuástálistem. Vistig mottoom autoinvyeijee orostij čäittiđ koskâsuormâ Pride-juávkun, já forgâ tastmaŋa poođij nubbe-uv autoinvyeijee, kote čaaitij peelgi vuáláskulij. Vajotooimah muštâleh pyereest, mondiet Pride-tábáhtus lii tehálâš sehe Anarist já pirrâ maailm.
Juávkku peesâi Saijoos šiiljon suullân tijme 13.30. Tobbeen tuállojii kijttosaavah. Ovdâmerkkân nuorâistivrâ NuVa kiijtij uásálisteid, sponsorijd, artistijd já ulmuid, kiäh tohhii tábáhtus máhđulâžžân. Tábáhtus suojâleijein Sämitige aairâs já arvetävgisämmilâš Janne Hirvasvuopio tollij sahâvuáru. Aanaar Pridest láin taan ive kyehti suojâleijee, kiäin nubbe lâi musikkár Hildá Länsman.
Sahâvuárui maŋa aalgij vuosmuš muusiklávdástem, ko aanaarlâš Nicholas Francett lavkkij läävdi oolâ. Francett lávdástem maŋa uárnejui Queer-tiätukišto, mast lâi máhđulâš uážžuđ palhâšume. Tiätukištoost lijjii koččâmušah eres lasseen arvetävgiulmui historjást já kulttuurist.
Tiätukišto maŋa ulmuuh pessii oppeet kuldâliđ muusik, ko anarâš Ulpu Mattus-Kumpunen (artistnommâ Ulpu!) láávlui já čuojâttij muusik sämi- já eŋgâlâskielân. Suu maŋa lâi savâstâllâmtilálâšvuotâ. Iššeen kiävttojii Aanaar Pride -savâstâllâmkoortah, main lijjii ovdâmerkkân koččâmušah seksuaal- já suhâpeliucceeblovoi háástuin maailmist. Savâstâllâm stivrij Anne Olli, kote ornij Säämi Pride ive 2017.
Tastoo lâi majemuš muusiklávdástem. Freak Out! -muusikjuávkku algâttij Anarist škovlâbändin, mutâ táálááh jesâneh láá meddâl ubâ Laapist. Muusikjuávkku čuojât eromâšávt rock- já meetaalmuusik sehe suomâ- já eŋgâlâskielân. Freak Out! lávdástem nuuvâi suullân tijme 17.00, kuás ubâ tábáhtus meiddei nuuvâi.
Aanaar Pride lii jo tobdos uási Aanaar keesist. Aanaar nuorâistivrâ NuVa lii ornim puoh kulmâ Aanaar Pride tábáhtus. Arvetävgiaašijn lii savâstâllum Aanaar kieldâst jo kuhháá. Majemustáá fáddá poođij savâstâllâmnáál nuorâistiivrâ Pride-liipputmân kyeskee alguu peht. Aanaar kieldâhaldâttâs hilgoi alguu. Arvetävgiääših láá aktiivlávt nuorâistiivrâ čuákkimij fáddán, já NuVa muštâlij-uv kijttosaavâst, ete palo vaajoost já olgooštmist ij kuulâ Aanaar kieldân.
Koveh: Ida Lassila (ráiđuväzzim já Nicholas Francett) já Kaisuli Poikela (eres koveh)