Kärpät vuoitij pronssispeelâst KalPa 3–2 jotkâääigist Oulust cuáŋuimáánu 19. peeivi. Teemu Turunen paajij vuáittumoolâ. Talle spellâmäigi lâi 71.08, já Kärpät-juávhust lâi jieŋâ alne ohtâ spellee eenâb ko vuástálistee juávhust. Turunen finnij skiäru Ville Koivusiist já Miika Koivistost. Eres moolâid paččii Kasper Björkqvist (1–0), Kasper Simontaival (1–1), Aapeli Räsänen (1–2) já Victor Berglund (2–2).
Kärpät lii vuáittám tääl ohtsis čiččâm pronssid SM-liigast. Juávhu ovdebáš miitaal lii ive 2019 silbâ. Kärpät algâttij taam jieŋâskiärrupaje hyeneeht já kaartâi lonottiđ välmejeijee juovlâmáánust. Uđđâ uáivivälmejeijee Ville Mäntymaa eeđâi pronssispeelâ maŋa, et sun lii tuođâi čiävláá juávhust já ubâ siärvusist. Suu mielâst taat spellâ lâi tego ubâ paje: vaigâdvuođâi peht vuáitun jotteem.
”Mij uážuim palhâšume stuorrâ pettâšume maŋa. Mij peessâp majemuu speelâ maŋa vyeitten vuoiŋâstiđ. Tot addel osko puátteevuotân”, pahudij juávhu kapteen Atte Ohtamaa. Sun eeđâi meid, et suu karrieer juátkoo mut ij lah vala vises, et juátkoo-uv tot Kärpät-juávhust. Ohtamaa lii vuáittám tääl vittâ SM-miitaal (2 kole, 2 siilbâ já 1 pronssi), já puoh Kärpät-juávhust.
Taan ive fiinaalrááiđust spellih Lahden Pelicans já Tampereen Tappara. Ráiđu aalgij lávárduv 20. peeivi.
Käldeeh:
– Kärpät vei SM-liigan pronssimitalit – Turunen teki voittomaalin (yle.fi)
– Ottelukooste: Kärpät–KalPa (liiga.fi)
– Karppien kausi huipentui SM-pronssiin (karpat.fi)
Kove: Oulun Kärpät 46RY (Wikimedia Commons)