Taan ive aalgâst poođij vuáimán uđđâ elleisuojâlemlaahâ, mii lii onnáá peeivi ellei pyereestvaijeemlaahâ. Uđđâ laavâ mield luánduvárásij ellei tipšosajeh ferttejeh almottâttâđ kuávluhaldâttâhtoimâttâhân majemustáá 1.3.2024. Almottâs kieđâvušmist piärroo 620 euro máksu.
Taan räi iävtutátuliih pargeeh láá tipšom luánduvárásijd elleid, já sij láá jo-uv jiejah máksám ellei tipšomkoloid tego purrâmuš, talkkâsijd já elleetuáhtár máávsuid, teikkâ koloh láá maksum toiguin ruđâiguin, maid ovtâskâs ulmuuh láá skeŋkkim ovdâmerkkân elleisuojâlemservijd. Tipšompargoid sij láá porgâm nuuvtá. Uđđâ máávsu tiet maŋgâsist iä lah eres muulsâiävtuh ko lopâttiđ ellei išedem. Suomâ elleisuojâlemservi SEY mield uđâsmittem já máávsu čuávumuššân luánduvárásij ellei tipšoviärmádâh sáttá joskâđ ollásávt toimâmist. Servi ana pyerrin äššin tom, ete tipšopääihih ferttejeh almottâttâđ, tastko tooimâ kocceem lii tienuuvt älkkeb já lii máhđulâš tiettiđ, magareh tipšopääihih láá já láá-uv tipšooh toháliih tipšođ luánduvárásijd elleid. Tot poođij kuittâg olâttâssân, et kuávluhaldâttâhtoimâttuvah väätih 620 euro máávsu jyehi almottâs kieđâvušmist.
Suomâ laavâ mield luánduvárásiih elleeh láá staatâ omâdâh, já ellei pyereestvaijeemlaahâ váátá, et luánduvárásijd elleid kalga išediđ. Lammâšum luánduvárásii ellee puáhtá väldiđ haaldun uánihis ááigán vuosâiše tâi tiipšon jođettem várás. Jis ellee áigu tipšođ vuosâiše maŋa, te laahâ váátá, et ellee tuálvoo tipšopááikán. Staatâ ij kuittâg ornii tipšo, peic lammâšum já uárbis luánduvárásij ellei tipšo lii Suomâst masa ollásávt kiddâ ovtâskâs ulmui rijjâtátulii pargoost.
− Rijjâtátuliih ulmuuh tipšoh täid staatân kullee elleid jieijâs ruđâiguin já jieijâs astoääigi. Sij pargeh laavâst meridum pargo nuuvtá. 620 euro mávssoin ellei uđđâ pyereestvaijeemlaahâ tuálvu luánduvárásij ellei tipšo aaibâs puástusuundán, iätá SEY toimâjođetteijee, elleetuáhtár Kati White.
Maaŋgah luánduvárásij ellei tipšooh tipšoh tuše muáddi ellee ivveest. Eromâšávt tagaráid ulmuid áinoo muulsâiähtu lii tooimâ lopâttem. White mielâst maaŋgâs láá-uv jo almottâm, et sij lopâtteh tipšompargo máávsu keežild. Sij iä suite mäksiđ ellei tipšokoloi lasseen vala 620 euro almottâttâmmáávsu. Uđâsmittem toovât ennuv huolâid já epivuoigâdvuođâlâšvuođâ tobdoid rijjâtátulâš tipšoid.
Luánduvárásiih elleeh lammâšuveh ennuv ovdâmerkkân ulmuu tovâttem eellimpirrâsij tuššâdem já nubástusâi sehe jotoluv tiet. Luánduvárásij ellei tipšoost lii meid merhâšittee roolâ ellei suoijâlmist já luándu maaŋgâhámásâšvuođâ tuárjumist.
Elisa Isoksela staatâvarijministeriöst muštâl, et mááksun lohtâseijee čuolmah láá sist tääl tiäđust. Suu mield ulmen lii tarkkuđ almottâttâmmáávsu uđđâsist, já máhđuliih nubástusah almottittojeh forgâ.
Käldeeh:
– Luonnonvaraisten eläinten hoitajille mojova maksu – SEY Suomen eläinsuojelun mielestä 620 euron maksu eläinten auttamisesta on vapaaehtoisille kohtuuton (sey.fi)
– Siilien pelastamisesta seuraa Annulii Koposelle pian ylimääräinen 620 euron lasku – eläinpiirit raivostuivat (yle.fi)
Kove: congerdesign (Pixabay)