Tennisspellee Rafael Nadal ij uásálist taanihásii Australia Open -tennisturnaamân. Pasepeeivi sun almottij speelâin kiäsádâtmist viestâpalvâlus X:st. Suijân sun addel smavvâ váádu:
– Ovdebáá speelâst must lâi smavvâ váddu teehist. Tot huolâstutij muu, tego tij tietivetteđ. Ko mun poottim Melbournen, te mun peessim magneetkuvviimân, main čielgâi, et must lii mikrorottâsem teehist. Tot ij kuittâg lah siämmáá saajeest, kogo muu ovdebâš váddu lâi, já tot lii šiev uuđâs.
Nadal čielgee:
– Tääl mun jiem lah vaalmâš kištottâllâđ alemuu tääsist viiđâ spellâmuási speelâin. Mun kirdám maassâd Espanjan já teeivâm jieččân tuáhtáráin, finniim váhá tipšo já peesâm vuoiŋâstiđ.
Nadal mielâst lii vaahâg, et sun ij peesâgin spellâđ kyeditteijee olmoošjuávhu oovdâst Australiast, mut puátteevuođâ sun liijká uáiná positiivlávt:
– Mun lam tuođâi porgâm ennuv maassâdpeessâm oovdân, já tego mun lam ettâm, muu ulmen lii spellâđ jieččân pyeremuu tääsist kuulmâ mánuppaje siste.
Nadal lii maccâm spellâmkieddijd uđđivemáánust ive puudâ maŋa, kuás sust čuopâdui čuárvitähti.
Käldee:
– ’I really wanted to play’ – Rafael Nadal withdraws from 2024 Australian Open with muscle injury (www.eurosport.com)
Kove: moerschy (Pixabay)