Jaapaanlâš luákkánjuškejeijee Ryoyu Kobayashi lii vuáittám taan ive Koskâ-Euroop luákkáoho. Tot lii neeljiuáság luákkánjuškimkišto, mii uárnejuvvoo jyehi ive Oberstdorfist já Garmisch-Partenkirchenist Saksaast sehe Innsbruckist já Bischofshofenist Nuorttâriijkâst. Koskâ-Euroop luákkáokko kulá FIS luákkánjuškim maailmcupân, já tot lii uárnejum jo 72 kerdid.
Luákkáokko 2023–2024 aalgij Oberstdorfist juovlâmáánu 28. peeivi 2023 já nuuvâi Bischofshofenist uđđâivemáánu 6. peeivi 2024. Uásikištoid láá vuáittám saksalâš Andreas Wellinger (Oberstdorf), slovenialâš Anže Lanišek (Garmisch-Partenkirchen), nuorttâriijkâlâš Jan Hörl (Innsbruck) já nuorttâriijkâlâš Stefan Kraft (Bischofshofen).
Jaapaanlâš Ryoyu Kobayashi lii puáttám nubben puoh uásikištoin. Sun lii kuittâg vuáittám ubâ luákkáoho ovdil Andreas Wellinger já Stefan Kraft. Luákkáoho ääigi Kobayashi uážui ohtsis 1 145,2 čuággád. Wellinger uážui 1 120,7 čuággád, já Kraft 1 112,7.
Lii uáli jo härvinâš, et Koskâ-Euroop luákkáoho vuáittá taggaar luákkánjuškejeijee, kote ij lah vuáittám oovtâgin uásikišto. Ovdil taan ive majemuš kerdi, ko návt keevâi, lâi 1998–1999. Talle syemmilâš Janne Ahonen vuoitij ubâ kišto, veikkâ sun poođij viđâdin vuossâmuu uásikištoost já nubben eres uásikištoin.
Luákkáookon 2023–2024 uásálistii ohtsis 66 luákkánjuškejeijed. Fáárust lijjii meiddei nelji syemmilii luákkánjuškejeijee: Antti Aalto, Niko Kytösaho, Eetu Nousiainen já Kasperi Valto. Sist pyeremus lâi Antti Aalto, kii poođij 35in. Majemui iivij syemmiliih láá piergim uáli jo hyeneeht luákkánjuškiimist. Suomâ válduvälmejeijee Juha Väätäisii mielâst toos láá vaikuttâm jieškote-uvlágáneh ääših, mut enâmustáá ruttâdem vänivuotâ já nuorâitooimâ hyenes tääsi.
Käldeeh:
– Vierschanzentournee Standings (www.fis-ski.com)
– Tähän päättyi suomalaisen mäkihypyn maine ja kunnia: ”Ei pidetty minään” (www.iltalehti.fi)
Kove: MatzeZe (Pixabay)