Avveel škovlâkuávdáš Kaarrest láá lamaš kyehti poolisääši taan ohhoost. Vuosmuš poolistärhistem lâi majebaargâ já nubbe tuorâstuv.
Majebaargâ uhkedem lâi puáttám škoovlân sosiaallii media Jodel peht. Puoh aalgij ovdil kyevti ehidispeeivi. Ton maŋa uáppeeh iä luoštum olgos luokkaast, pic sij lijjii vuorâsulmuu kocceem vyelni ubâ ääigi. Uáppeeh iä uážžum vyelgiđ meddâl iäge jotteeđ olgon. Uáppeeh iä meid uážžum leđe laasâi alda iäge keččâđ olgos. Uhkedeijeekyevtis lává tiäđust.
Poolis mield tuorâstuv uhkedem lâi puáttám koskoho eehid siämmáá ääigi ko škoovlâst lâi monâmin tieđettemtilálâšvuotâ vaanhimáid. Yle muštâl, et šleđgâpostâ luhhui kuittâg esken iđedist suullân oovce ääigi. Uhkedeijee lii tääl poolis tiäđust.
Kuohtui peivij poolis sierrij kuávlu já tärhistij škoovlâ. Uáppeeh vuordii tärhistem ovdánem luokkain, moh lijjii lukkâdum. Škovlâkuávdáást joteh škoovlâ paijeel 500 pärnid já nuorrâd. Vaanhimeh finnejii viestâ tiileest škoovlâ Wilma-viestâdemsysteem peht.
Laapi poolis táátui páihálijd ulmuid pissoođ meddâl škovlâkuávdáást. Motomeh tiätuäŋgiris ulmuuh irâttii kuittâg keččâđ tábáhtuumijd aldeláá. Poolis stivrij sii meddâl škoovlâ aldasijn.
Käldeeh:
– Ivalon koulukeskukseen tehtiin uhkaus sosiaalisessa mediassa – tuntien odotuksen jälkeen oppilaat pääsivät lähtemään kotiin (yle.fi)
– Koulu-uhkaus ohi Ivalossa – vaara ei konkretisoitunut (yle.fi)
Kove: Sonja Valle