Helsig kirdemkiedist torvotärhisteijeeh áiguh marssiđ olgos tuorâstuv. Taat sáttá äjittiđ Helsig-Vantaa kirdemkiedi torvotäärhistmijd meid olgosmarssim nuuhâm maŋa, muštâluvvoo kirdemsajattâhfinnodâh Finavia viestâdmist. Pargo-orostittem lii meeri pišteđ tijmepele tijme 13.30–14.00. Olgosmarssim lii pooliitlâš mielâčäittim haldâttuv toimâi vuástá, ige tot lah čujottum pargoadeleijei ige vyeimist leijee pargoiähtusopâmušân.
Olgosmarssim maŋa torvotärhistemsajeh liäkkojeh kuuloold, nuuvt et poođhah sättih pišteđ kuhheeb-uv ko tijmepele.
Finavia tiädut, et mađhâšeijeid lii pyeri čuávvuđ já nuávdittiđ vuosâsajasávt jieijâs kirdemfinnoduv ravvuid kirdemkiädán puáttim äigitaavluin. Tuorâstuv spiekâstâhtile keežild torvotäärhistmân lii kuittâg pyeri väridiđ mottoom verd laseääigi.
Helsig-Vantaa kirdemkiedist lii ohtâ torvotärhistemsaje vyelgee mađhâšeijeid, tärhistemsaje ruuman mannee mätkitäviráid já sierâ torvotärhistem Schengen-kuávlu ulguubeln puáttee mađhâšeijeid. Olgosmarssim vaaigut puoh kuulmâ sajan.
Käldeeh:
– Ulosmarssi Helsinki-Vantaalla voi vaikuttaa vielä päättymisensä jälkeen (www.is.fi)
– JHL järjestää ulosmarssin Helsinki-Vantaan lentoaseman turvatarkastuksessa ensi torstaina (yle.fi)
Kove: Rudy and Peter Skitterians from Pixabay