Taaiđâmáálár Grahame Hurd-Wood lii algâttâm eromâš proojeekt: sun haalijd mááláđ hämikove puoh St Davids kaavpug ässein. Luhhoost sun áásá St Davids Pembrokeshirest, kost ääsih ”tuše” suullân 1 800 olmožid. Liijká taat viehâlágán urkko taiđârân, já love ihheed proojeekt algâttem maŋa City of Portraits ‑proojeekt lii pyerebeht-uv vijđánmin ko káržumin.
Taaiđâr lâi jo máálám love ihheed tassaaš čyeti hämikovveed ulmuin, kiäid sun tuubdâi, mut talle kooskân poođij persovnlâš tragedia: Debbie, suu pyeri ustev, puáccái purâstaavdân já táátui mááláđ jieijâs tieđehánnáá tast, et hämikove valmâštuuččij esken suu jäämmim maŋa.
Grahame máálámurkko aktivistui Debbie jämimist. Talle Grahame smietâi, et ubâ proojeekt váldáččij viiđâst love ihán. Tääl sun uáiná, et urkko juátkoo kuhás puátteevuotân.
Grahame lâi ovdil urkkoos älgim ohtii ovdil elâččâm St Davidsist, já 1980-lovvoost sun poođij kaavpugân oovtâ kiäsán. Sun kuittâg ”vájáldui” päikkikoodán váhá kuhheeb ááigán já lii aassâm tobbeen ton rääjist.
Hämikuuvij lasseen sun mááláá enâduvâid, já taah taavluh láá stuárráh. Taat váátá ääigi. Ko sun mááláá smavvâ hämikuuvijd, sun čielgee, et koččâmuš lii váháš áigáá pištee kontaktist kiäinnii já et jyehi hämikooveest lii smavvâ maainâs – lâiba tastoo koččâmuš tast, et kiinii sárnu eellimstis teikâ mottoom hiärváás ääšist, mut koččâmušâst lii ain eromâš maainâs jieškođe-uv persovnist. Tondiet koveh láá nuuvt intensiivliih.
Sun muštâl, et ulmuuh teivih suu mááláámáid veikâ moin naalijn. Motomijd sun jieš puávdee, já motomin sun sáttá koijâdiđ kävppimääđhist ulmuin, halijdiččii-uv sij čokániđ suin hämikove rähtimân. ”Ulmuuh ain mietih. Tuše ohtâ olmooš teikâ kyevtis lává kiäldádâttâm”, sun čielgee.
Tääl ko sun lii máálám nyevt 1 000 hämikovveed, te sun haalijd čäittiđ ulmuid, et sun lii luhostum. Sun lii sárnumin St Davids katedraaláin tast, et sun orniiččij puáttee ive tobbeen čáitálduv, teikâ talle hämikuuvijd puávtáččij čaittâliđ meid kaavpugstiivrâst, kost lii eromâš stuorrâ čáitáldâhsaje.
Grahame čielgee, et sun lii aassâm St Davidsist jo kuhháá, mut haavâ olášittem lii puáhtám suu aldeláá jieijâs päikkikode.
”Jyehi hämikove keežild mun tuubdâm, et lam eenâb uássin jieččân päikkikode”, sun čielgee.
Ohtsâškode mááláámijn váiluh kuittâg vala Grahame jieijâs muáđoh. Sun tuáivu, et mottoom eres taaiđâr motomin máálááččij suu siämmáá ohtsâškode uássin.
Käldee:
– Art: 10-year mission to paint everyone in St Davids (www.bbc.com)
Kove: David Lloyd (Pixabay)