Lávurduv 5.8. ehidispeeivi Aanaar markkânist uáinojeh äijihtäävgi puoh ivneh, ko Aanaar nuorâistivrâ (su. NuVa ađai nuorisovaltuusto) uárnee jo nube tove Aanaar Pride -tábáhtus. Tijmá tábáhtus luhostui uáli jo pyereest, já jo talle uárnejeijeeh meridii orniđ uđđâ tábáhtus keessiv 2023. Taan ive ohjelm sulâstit-uv tom maaŋgânáál.
Tábáhtus álgá ráiđuväzzimáin tme 13.00 Sämimuseo Siida oovdâst. Ráiđu jotá Aanaar markkân peht Sajosân, kost ohjelm juátkoo tme 17.30 räi.
Tábáhtusâst lávdásteh muusikjuávkku Freak Out! já lávloo Lyyti, mon lasseen lyevi lii ávusin puohháid konsertij maŋa (nk. open stage). Ohjelmist lii meiddei el. piknik, tiätukišto, siärvuslii taiđuu rähtim, savâstâllâm sehe räsivierâi já piinsij rähtim.
Ulmen rähtiđ torvolii saje
Aanaar Pride olgospuáhtá tergâdis fáádáid. Nuorâistiivrâ ulmen lii lasettiđ tiäđuid seksuaal- já suhâpeliucceeblovoin sehe čäittiđ, ete arvetävgiulmuuh kávnojeh meiddei taan kuávlust. Nuorah halijdeh, ete Aanaar ličij torvolâš já ovtviärdásâš saje arvetävgiulmuid. Sij nabdeh, ete palo olgooštmist teikâ vaajeest ij kuulâ Anarân.
Maaŋgah páiháliih finnoduvah, siärvuseh já meiddei ovtâskâs ulmuuh tuárjuh taanihásii Aanaar Pride. Aanaar kieldâ rijjâäigitoimâ já kulttuurtoimâ láá toohâm máhđulâžžân tom, ete nuorah jiejah peessih hárjuttâllâđ tábáhtus ornim. Sii tuáivu mield tábáhtus lii ávus puohháid ige magarijdgin uáivâdâsâid uážu tobbeen anneeđ. Tábáhtus heivee puohahasáid, mutâ nuorâin lii váldurooli sehe orniimist já ráiđuväzzimist.
Tábáhtus várás uárnejuvvojeh kyehti kolbâpargopääji:
Avelist tuorâstuv 3.8. tme 16–20. Saje: Stönö (Vasantie 1)
Anarist vástuppeeivi 4.8. tme 16–20. Saje: Vintti (Lehtolantie 3)
Uássin stuárráb lihâdâsâst
Pride (teikâ ”Gay Pride”) lii maailmvijđosâš lihâdâs já filosofia, mon ulmen lii pyehtiđ oovdân já piäluštiđ seksuaal- já suhâpeliucceeblovoid sehe sii vuoigâdvuođâid.
Vuossâmuš Pride-tábáhtus Anarist lâi ive 2017, já tot lâi nk. virgálâš Sápmi Pride. Taan ive Sápmi Pride uárnejuvvoo Hettaast 11.–13.8., já ton orniimist váldurooli lii Suomâ säminuorâin (SSN).
Käldee:
– Inarin Nuorisovaltuusto (www.instagram.com)
Kove: Aanaar nuorâistivrâ