Afrik taveuásist leijee Nigerist aalgij moonnâm koskoho vääldikomettem já vástuppeeivi komettem jođetteijee, kenraal Abdourahamane Tchiani almottij, ete sun lii staatâ uđđâ jođetteijee. Sun lii toimâm tolebáá president vahtiittâhkaarti jođetteijen. Niger president Mohamed Bazoum lii viehâ vissásávt faŋgân päihistis. Sun lii lamaš staatâ presidentin ive 2021 rääjist, kuás uárnejuvvojii Niger vuosmuuh rijjâ vaaljah. Staatâ šoodâi jiečânâssân Ranskaast ive 1960, já tastmaŋa ton tile lii lamaš uáli epistääđis. Nigerist lâi tuše ohtâ piäládâh ive 1991 räi, já tot lii ovdil-uv killám stuuimijn já vääldikoomeetmijn, majemustáá ive 2010.
Vääldikometteijeeh váruttii tv-saavâst, ete olgoenâmeh iä siähániččii suáldátlávt staatâ tábáhtussáid. Maaŋgah enâmeh já ornijdumeh tego Ovtâstum staatah, Euroop union já Afrik union láá tuommim vääldikomettem. Afrik union lii vaattâm, ete suáldátteh, kiäh láá algâttâm komettem, mäccih sajasis já macâtteh enâmân vuáđulavâlii oornig. Afrik union ráávhu já torvolâšvuođâ rääđi váátá moonnâm oholoopâ almostittum ciälkkámušâstis, ete suáldátteh lyepih vääldist viđânubálov peeivi keččin. EU lii almottâm, ete tot ij tuubdâst vääldikometteijeid Niger haldâšeijen já áigu lopâttiđ puoh torvolâšvuotâohtsâšpargo staatáin. Uáli kievhis enâmist lii ennuv ovdedemohtsâšpargo, mut vääldikomettem tiet projekteh láá nuuhâm. Niger, tego maaŋgah Sahel kuávlu enâmeh-uv, killáá robdâislamlijn já eres viärjulijn juávhuin. Viestârenâmeh láá tuárjum kuávlu enâmijd taistâlmist juávhui vuástá, mut toi vaikuttemväldi lii vala-uv styeres. Niger lii kočodum viestârenâmij majemužžân littolâžžân kuávlust, já ovdâmerkkân Ovtâstum staatâi investistmeh toos láá lamaš merhâšitteh.
Viestâr-Afrik ekonomiasiärvádâh Ecowas lii asâttâm ekonomisijd raijiittâsâid Niger vuástá. Ton lasseen Ecowas-enâmeh láá meid uhkedâm riemmâđ viärjutoimáid, jis vääldikometteijeeh iä luovât vääldi maasâd presidentân. Motomeh Viestâr-Afrik enâmeh láá kuittâg vuástálistám vyestitooimâid. Mali já Burkina Faso láá kiäldádâttâm ekonomisij raijiittâsâi tooimânpiejâmist já láá almottâm, ete viärjulâš kooskânpuáttim merhâšičij suáđijulgáštâs. Meid tai enâmij táálááh haldâttuvah láá šoddâm vääldikoomeetmist.
Viestârenâmij huollân láá eromâšávt pälkkisuáldátfinnodâh Wagner já Ruošâ vaikuttemvääldi stuárrum kuávlust. Viestârvajemielâlâšvuotâ já Ruošâ kannattem láá lasanâm Nigerist majemui aaigij. Wagner jođetteijee Jevgeni Prigožin lii falâdâttâm tuárjuđ vääldikometteijeid, mut meerhah Wagner mieldioromist Nigerist iä aainâskin vala lah. Pälkkisuáldátfinnodâh lii kulostum merhâšittee roolistis Ruošâ vollitmist Ukrainan, mut tast lii lamaš jo kuhháá vaikuttemvääldi Tave-Afrikist sehe Aldanuorttân, kost tot lii ávhástâllâm epistäđis staatâi siskonfliktijguin ovdâmerkkân Syyriast, Koskâ-Afrik täsivääldist já Malist. Niger lii meiddei merhâšittee uuraan já oljo pyevtitteijee, já riskâ toos, ete uuraan kárttá puástu kiävttutárguttâsân ovdâmerkkân váimusviärjoid lii ennuv stuárráb, jis eennâm lii epistäđis tiileest.
Käldeeh:
– Seitsemän syytä, miksi Nigerin vallankaappaus hermostuttaa länttä – yksi niistä on Venäjä (yle.fi)
– Vallankaappauksen johtohahmo ilmoitti televisiossa olevansa Nigerin uusi johtaja – Wagnerin Prigožin on tarjonnut apuaan kaappaajille (yle.fi)
– Afrikan unioni vaatii Nigerin vallankaappaajia perääntymään – EU keskeyttänyt kaiken turvallisuusyhteistyön maan kanssa (www.mtvuutiset.fi)
– Sotilaallinen väliintulo olisi sodanjulistus Burkina Fasoa ja Malia vastaan, maat sanovat (www.hs.fi)
Kove: David Peterson (Pixabay)