Aalmuglâš Kokoomus saavâjođetteijee Petteri Orpo iirât hammiđ haldâttuv Kkoomussáin, Vuáđusyemmilijgijn, Rkp:in já Ristâlâšdemokraatijgijn. Majebaargâ haldâttâhráđádâlleeh tuálih seminaar Säätytalost Helsigist. Haldâttâhráđádâlmeh älgih koskoho.
Orpo muštâl, et vistig ráđádâlmijn kiäččoo ubâlâš kove já ton maŋa ”stuorrâ reformeh, maid Suomâ taarbâš”. Sun tiädut piäláduvâi ohtsâšjiegâ huksim. Sun iätá, et ubâlâš kove tyehin lii staatâvarijministeriö 6 + 3 -ulme, ađai ekonomia ferttee heiviittiđ taan haldâttâhpaje ääigi kuuđáin miljardáin euroin já puáttee haldâttâhpaje kulmáin miljardáin. Taan haldâttuv tyehin lii toimâpaje 2023–2027.
Vuáđusyemmilij saavâjođetteijee Riikka Purra iätá, et masten ij lah sooppum já et vädis koččâmušah láá ennuv. Sun noomât čuoppâmijd já enâmânvarrim, eromâšávt pargosuujáid vuáđudeijee siisâvarrim. Suu mield ekonomia heivitmist láá kelduuh Vuáđusyemmilij já Kokoomus kooskâst.
Rkp saavâjođetteijee Anna-Maja Henriksson muštâl, et Rkp vuálgá ráđádâlmáid tuođâi. Suu mield piäládâhân tehelâš lii ekonomisâš šoddâm já aargâ torvolâšvuotâ.
Ristâlâšdemokraatij saavâjođetteijee Sari Essayah iätá, et sii piäládâhân koskâsâš äšši lii ekonomia oornigân finnim. Sun tiädut eromâšávt pargonaavcâin huolâ anneem já pargoostvaijeem.
Käldeeh:
– Ilta-Sanomat já Iltalehti: njuolgâvuolgâttâs Säätytalost
Kove: Tapio Haaja (Pixabay)