Rotterdam elleikärdi muurâšt Vuáládâhenâmijn: ton peeggâlmumos ässee, silbâselgigorilla Bokito, lii jáámmám nohádittem ääigi. Elleikäärdi hovdâ Erik Zevenbergen tieđeet Bokito jämimist näävt:
Bokito-gorilla jaamij Blijdorp elleikäärdist vyerdihánnáá cuáŋuimáánu 4. peeivi. Bokito lâi lamaš illávaje jo pasepeeivi rääjist. Vuossaargâ ton suándi tutkui já tot onnui pyerebeht čalmeest. Majebaargâ ton tile ij lam ollágin puáránâm. Tondiet elleituáhtár meridij tutkâđ tom pyerebeht, noháditij tom já adeliđ toos suonân kolgos. Bokito jaamij nohádittem ääigi. Jäämmimsuijâ ij lah vala čielgâm, já äšši totkoo. Gorillajuávkku muurâšt čuuvtij njunošis monâttem. Meiddei pargeeh já eromâšávt gorillai tipšooh láá soroliih.
Bokito šoodâi njuhčâmáánu 14. peeivi 1996 Berlin elleikäärdist. Ive 2005 Bokito sirdui Rotterdam elleikáárdán Euroop näliohjelm keežild. Ive 2007 Bokito lâi maailm uđđâsijn ko tot kárgái gorillasuollust já suorgâttij ulmuid: tot ruotâi pirrâ elleikäärdi tassaaš ko elleituáhtár noháditij tom nohádittemtavgijn elleikäärdi raavvâdviäsust. Ohtâ nissoon ruásnului viärráht Bokito volliittem keežild já kaartâi čuopâduđ luhhii. Kárgám maŋa Bokito tolvui maassâd gorillasuollui, mon koolgâi tivodiđ já nonniđ ton várás, amas kárgáámeh tábáhtuđ uđđâsist. Taan tábáhtus maŋa hollandkielân šoodâi uđđâ eđâldâh eromâš noonâ tiŋgáid: ”Bokito-proof”, adai Bokito-čaavdes.
Bokito finnij elleikäärdist maajeeldpuátteid já tast šoodâi sosiaallâš peerâores. Tot meid tuhhiittij ”piämmukaandâ”, mii lii uáli epitáválâš gorillaid. Bokito toolâi gorillaperrust oornig já almolii ráávhu.
Käldee:
– Gorilla Bokito overleden (www.diergaardeblijdorp.nl)
Kove: Edo Emmerig (Pixabay)