Lávurdâh lâi viestâi peivi Juvduuvääri čuoigâmkuávdáást Anarist. Iđedist tme 10.05 lâi nisonij 3 x 5 km viestâ, já ehidispeeivi tme 13.00 aalgij almai 4 x 10 km viestâ.
Nisonij viestâst lijjii fáárust 24 juávkkud. Vuokatti Ski Team Kainuu -juávkku (Vilma Nissinen, Eveliina Piippo, Jasmin Kähärä) vuoitij kišto aigijn 39:39.5. Ikaalisten Urheilijat -juávkku (Hilla Niemelä, Katariina Lonka, Krista Pärmäkoski) vuoitij silbâmiitaal aigijn 40:29.7, já Vantaan Hiihtoseura-1 -juávkku (Anni Kainulainen, Rebecca Immonen, Jasmi Joensuu) vuotij pronssimiitaal aigijn 40:45.4. Peeivi jotelumos čyeigee lâi Eveliina Piippo miäštárjuávhust aigijn 12:29.5.
Almai viestâst lijjii fáárust 33 juávkkud. Jämin Jänne -juávkku (Aku Nikander, Ristomatti Hakola, Markus Vuorela, Lauri Lepistö) šoodâi Suomâ miäštárin, ko tot vuoitij kišto aigijn 1:36:43.7. Imatran Urheilijat -juávkku (Olli Ahonen, Ville Ahonen, Remi Lindholm, Miro Karppanen) vuoitij silbâmiitaal aigijn 1:37:26.5, já Puijon Hiihtoseura-1 -juávkku (Joonas Sarkkinen, Iivo Niskanen, Perttu Hyvärinen, Arttu Heikkinen) poođij kuálmádin aigijn 1:38:08.0. Peeivi jotelumos čyeigee lâi Perttu Hyvärinen pronssijuávhust aigijn 22:33.9. Pronssijuávkun kuulâi meiddei Iivo Niskanen, kote lâi jieijâs uási ađai nube uási jotelumos čyeigee.
Almai viestân uásálistii meiddei aanaarliih čyeigeeh. Inarin Yritys 1 -juávkku (Markus Hietanen, Eelis Valikainen, Niila Ahokas, Reima Idström) poođij kulmânubálovádin aigijn 1:44:31.6, já Inarin Yritys 2 -juávkku (Matias Riipi, Elias Valikainen, Turo Tervo, Juho Friman) poođij kulmâlovádin aigijn 1:51:09.4.
Käldeeh:
– Naiset 3 x 5 km (www.smhiihdot.com)
– Miehet 4 x 10 km (www.smhiihdot.com)
Kove: Fabrizio Brecciaroli