Palvâlemsuorgij pargoadeleijeeh (su. Palvelualojen työnantajat, PALTA) já Ryevdirađesyergi Union (su. Rautatiealan unioni, RAU) láá sovâdâttâm junávyeijei pargoiävtuin. Kuohtuuh peleh láá tuhhiittâm väldikodesovâttellee iššijn 22.3. uđđâ ráđádâllâmpuáttus, já junávyeijein lii tääl uđđâ pargoiähtusopâmuš, mii lii vyeimist 22.3.2023–31.3.2025. Taan uđđâ sopâmuš vuáđuld junávyeijei 20.3. algâttem jasko nohá.
– Mij lep tuđâvááh, et sovâdâttâm lâi máhđulâš vädis ráđádâlmij maŋa. Kyehti ive vyeimist leijee uđđâ sopâmuš taha máhđulâžžân pargoiävtui ovdedem kuhes ääigi uáinust, muštâl ráđádâllâmhovdâ Pasi Vuorio Palta tiäđáttâs mield.
Pargoiähtusopâmuššân láá sooppum almos linjá miäldásiih palhij paajeedmeh. Sopâmuš tuálá sistees vijđes pyereestvaijeemhaavâ pargoost. Tot tuárju pargo já rijjâääigi oohtânsovâttem vuárupargo uáinust já taha meid máhđulâžžân pehtilis pargovuáruvuáváámijd. Haahâ siskeeld vijđes páihálii sooppâm máhđulâšvuođâid pargoiähtusopâmuš pargoäigimiärádâsâin.
Ive 2023 päälhih pajaneh 4,0 prooseent stuárusáin almospaajeedmáin 1.5.2023 rääjist já ive 2024 2,0 prooseent stuárusáin almospaajeedmáin 1.6.2024 rääjist.
VR tieđeet, et aldajotoluv vuosmuš vuáru jottáá vuod tijme 04:04 já kuhes määđhi jotoluv vuosmuš vuáru tijme 03:40. VR kuhes määđhi já aldamaađhij jotolâh máccá normaalân suullân pirrâmpeeivi siste.
Käldeeh:
– Palta ja RAU sopuun veturinkuljettajien työehdoista – junaliikenteen lakko päättyy (www.palta.fi)
– Rautatiealan lakko on päättynyt – junaliikenne käynnistyy 24.3.2023 (www.vr.fi)
Kove: Michael Gaida (Pixabay)