Sveeici Valais kantonist Crans-Montana mađhâšemkuávlust sattui uđđâvuođâááptu sorolâš tragedia, ko Le Constellation ‑nommâsâš baari puállái. Pyelimist jammii 40 olmožid já lammâšuvvii 115 olmožid. Sveeici president Guy Parmelin kočoi pyellim ohtân puoh viärráámuin tragediain, mii Sveeicist lii kuássin sattum. Vástuppeeivi uđđâivemáánu 9. peeivi enâmist uárnejuvvoo aalmuglâš soropeivi. Talle tijme 14 tuálloo miinut kukkosâš joskis puddâ.
Sveeici poolis muštâl, ete puoh luhottesvuođâst jáámmám ulmui identiteet lii selvâttum. Uámikkâsah ovdâsteh kuittâg 12 aalmugjeessânvuottâd. Tiäđui mield 20 uhred lijjii vuálá 18‑ihásiih. Vuossaargâ uđđâivemáánu 5. peeivi 83 ruásnulum olmožid lijjii vala pyecceiviäsust.
Pyellim vaarâ aalgij riššokinttâlijn, moh lijjii pieijum šamppanjaputtâláid. Kinttâleh cokkiittii baari káátu. Páiháliih virgeomâhááh muštâleh, ete baarist iä lamaš porgum merikoskâsiih torvolâšvuotâtarkkuumeh viiđâ ihán. Sveeici virgeomâhááh láá algâttâm rikostutkâm baari omâsteijein. Kyehti ulmuu epiduvvov jäämmimtoovâtmist, váádutoovâtmist já pyellim toovâtmist huolâttesvuođâ keežild.
Käldeeh:
– Sveitsin presidentti: uudenvuodenyön tulipalo on Sveitsin kaikkien aikojen pahimpia tragedioita (yle.fi)
– Kaikki Sveitsin tulipalon uhrit on tunnistettu (yle.fi)
– Les 40 victimes, dont 20 mineurs, ont été identifiées et toutes les familles averties (www.rts.ch)
– Sveitsissä tulipalossa tuhoutuneen baarin omistajia epäillään kuolemantuottamuksesta (yle.fi)
– Sveitsin tulipalobaarissa ei ollut tehty turvallisuustarkastuksia vuosiin, myöntävät viranomaiset (yle.fi)
Kove: Christian David (Wikimedia Commons)