Muotikovvejeijee Oliviero Toscani lii jáámmám 82-ihásâžžân. Sun lâi tobdos ruokkâdis já vááimun čyeccee kuvijnis italialii Benetton-pivtâsbrändin. Sust lâi härvinâš tavdâ, amyloidoos, mii vahâgit tehálijd orgaanijd já niärváid.
Toscani peerâ muštâlij sorouđđâs uđđâivemáánu 13. peeivi 2025. Suu kálgu Kirsti almostitij tiäđu Instagramist. Muáddi peeivi ovdil jäämmim Toscani lâi karttâm Cecina pyecceiviäsun. Sun eeđâi moonnâm ive, et sun ij tieđe, mon kuhháá sun vala iälá.
Toscani kuvvij máinuskuvijnis tehálijd ohtsâškodálijd teemaid. Suu pargo kieđâvušâi eres lasseen AIDS, rasism, suáđi já jäämmimráŋgáštâs. Benetton kunnijâttij suu eellimpargo almostitmáin puáris kuuvijd.
Oliviero Toscani šoodâi Milanost cuáŋuimáánu 28. peeivi 1942. Suu eeči lâi pegâlmâs čuovâkovvejeijee italialii Corriere della Sera -aavisist. Toscani luuvâi taaiđâškoovlâst Zürichist Sveeicist. Karrieeris ääigi sun poorgâi maŋgáid muotilostáid, tegu Voguen já GQ:ân.
Toscani kuvvij maaŋgâid kulttuurlijd ikonijd, tegu Andy Warhol, John Lennon já Federico Fellini. Sun poorgâi Benettonân 18 ihheed já raahtij pegâlmâs ”United Colours of Benetton” -kampanjaid. Suu koveh lijjii távjá kištâlemvuálásiih. Ovdâmerkkân koveh Bosnia-suáldát ivnáin pihtâsijn, AIDSân jämmee almast sehe paapâ já nuná cummeest finnejii stuorrâ huámmášume.
Käldeeh:
– Oliviero Toscani, Benetton’s shock photographer, dies aged 82 (www.bbc.com)
– Maailmaa kohahduttaneet Benetton-kuvat ottanut Oliviero Toscani on kuollut – tältä näyttävät hänen ikoniset työnsä (www.hs.fi)
Kove: Eirik Solheim (Wikimedia Commons)