Suomâ kulttuur- já tieđâinstituuteh rs. valjij ihečuákkimstis cuáŋuimáánu 25. peeivi Pirita Näkkäläjärvi saavâjođetteijen čuávuváá kulmâ ive pištee pajan. Näkkäläjärvi lii náguskirjetotkee, kävppitiettui maister Helsig kävppiollâškoovlâst sehe media já viestâdem maister London School of Economicsist. Sun tooimâi Yle Sápmi hovdân iivij 2012−2016. Näkkäläjärvi lii porgâm aalmugijkoskâsii irâttâskävppi- já strategiatooimâin ovdâmerkkân Merrill Lynchist, Nokiast já PwC:st. Tääl sun tuáimá Suomâ Sämitige saavâjođetteijen.
− Lii stuorrâ kunnee peessâđ jođettiđ kulttuur- já tieđâinstituutij ohtsâšpargo-orgaan tággáár ääigi, kuás taiđust já tiettust lii máhđulâšvuotâ leđe tehálâš vyeimi uássin siärvádâhlii savâstâlmist, kulttuurij koskâsii addiittâlmist já pyere eellim huksiimist, iätá Näkkäläjärvi.
Näkkäläjärvi lii porgâm ohtsâšpargo eereeb iärrás Suomâ Ranska- já Suomâ Benelux -instituutijguin. Sun lii toimâm Suomâ kulttuur- já tieđâinstituuteh rs. haldâttâs värijesânin ive 2023 rääjist.
Suomâ kulttuur- já tieđâinstituutij servi eereeb iärrás nannee instituutij toimâmmáhđulâšvuođâid já lasseet ibárdâs instituutij tooimâ vaaikutmist. Tot oovded meid viärmáduv ohtsâšpargo systemaatlávt já meritiäđulávt.
Ovdil Näkkäläjärvi seervi saavâjođetteijen tooimâi Sakari Karjalainen iivij 2018‒2024. Uđđâ saavâjođetteijee Pirita Näkkäläjärvi lasseen Suomâ kulttuur- já tieđâinstituuteh rs. haldâttâsân kuleh Leif Jakobsson, Kati Laakso, Mikko Myllykoski, Eeva Talvitie já Fatim Diarra sehe värijesâneh Hanna Snellman já Sani Kontula-Webb.
Käldeeh:
– Pirita Näkkäläjärvi válljejuvvon Suoma kultuvra- ja dieđainstituhtaid ságadoallin (yle.fi)
– Suomen kulttuuri- ja tiedeinstituutit ry:n puheenjohtajaksi Pirita Näkkäläjärvi (instituutit.fi)
Kove: Ville Fofonoff / Sämitigge