Voyager 1-luođân vuolgât oppeet anolijd tiäđuid Eennâmpáálu oolâ, muštâl Ovtâstum staatâi komovuotâhaldâttâh NASA. Voyager 1 lii puoh kaidâmuš ulmuu rähtim já komovuotân vuolgâttum tiŋgâ.
Luođân lâi joskâm vuolgâtmist luvâttittee tiäđuid skammâmáánu pelimuddoost, veikkâ tot lâi ain vuástáváldám koččomijd. Njuhčâmáánust huámmášui, ete suijân lâi ohtâ vádulâš čiegâ. Čuávdusin rahtui koodi, mii tooimâi luođân 46 ihheed puáris tiätturvuáháduvâst. Tääl Voyager 1 lii maacâtmin anolijd tiäđuid luođân teknisij vuáháduvâi tiileest. Čuávuváá läävhi ulmen lii toohâđ máhđulâžžân, et luođân puávtáččij vuolgâttiđ oppeet tieđâlijd tiäđuid, tieđeet NASA.
Tot, mii tovâttij Voyager váádu, ij lah vala vises. Insnereh arvâleh, et máhđulávt energiačalmaaš ličij teividâm čieggâmân, teikkâ talle tot lâi tuše kohhum 46 ive maŋa.
Voyager 1- já 2-luođâneh páččojii komovuotân ive 1977. Luođâneh láá tutkâmin täsnikoskâsii komovuođâ. Voyager 2 juátká tooimâs tego táválávt. Algâaalgâst Voyager 1-luođân ulmen lâi tutkâđ Jupiter já Saturnus vittâ ive pištee kirdemist. Ton mätki kuittâg jotkui, já porgemáánust 2012 Voyager 1 juuvsâi täsnikoskâsii komovuođâ. Luođân lii vuossâmuš ulmuu rahtim tiŋgâ, mii vuolgij piäiváškode ulguubel. Ton mätki lii pištám tääl jo 46 ihheed.
Käldeeh:
– Voyager 1 -luotaimelta saadaan jälleen käyttökelpoista dataa (yle.fi)
– Engineers Pinpoint Cause of Voyager 1 Issue, Are Working on Solution (blogs.nasa.gov)
– Voyager 1 transmitting data again after Nasa remotely fixes 46-year-old probe (www.theguardian.com)
Kove: NASA/JPL-Caltech