Aanaar kieldâstiivrâst koskoho 21.9.2023 ohtân čuákkimäššin lâi investistee Veikko Lesosii hooteelhaahâ Aanaar Almaanjaargâst. Kieldâstivrâ hilgoi čuákkimstis hooteelhaavâ jo nube tove. Iävtuttâs kománij oovtâ jienâ iänáduvváin 14–13. Kieldâstivrâ jeessân Anu Avaskari jienâstui čuákkimist iästulâžžân tondiet ko sun lii uásálâžžân aldasijn leijee eennâmpittáást.
Čuákkim äššilistoost miärádâsiävtuttâssân lâi tuhhiittiđ 31.5.2023 peividum ucâmuš kaavamiäldásii huksiimist. Koččâmušâst lâi investistee Veikko Lesosii hooteelhaahâ Almaanjaargâst, čiččâm kilomeetterid válduluodâ mield já tastoo love kilomeetterid čunoiluodâ mield tavenuorttii kuávlun. Taan hooteel kapasiteet ličij lamaš 100 äššigâssâd já 20 parged.
Čuákkimist stivrâjeessân Pirita Näkkäläjärvi iävtuttij iävtuttâs hilgom. Sun vuáđuštâlâi jieijâs uáinu eereeb iärrás aalmugadressáin, mon lijjii vuáláčáállám paijeel 200 Aanaar kieldâ ässed uánihâš ääigist. Sun vuáđuštâlâi hilgomiävtuttâsâs meid toin naalijn, et kieldâstivrâ lâi jo ohtii ovdil hilgom taan kuávlun kyeskee kaavaiävtuttâs. ”Almaanjargâ lii anarâšâi váimuskuávlu já uási anarâšâi kulttuurist, já tom ferttee tagarin suojâliđ já varjâliđ”, sun vuáđuštâlâi. Suu iävtuttâs finnij kyedittem Anni Koivistost já Heli Palolahtist. Meiddei tijmá kieldâstivrâ hilgoi siämmáá kuávlu kaavaiävtuttâs oovtâ jienâ iänáduvváin 14–13.
Čuákkimist lâi savâstâllâm taan fáádást, já Aanaar kieldâ teknisâš hovdâ Reetta-Mari Tammela vuáđuštij kaava siskáldâs já kaavamproosees. Reetta-Mari Tammela vuáđuštâllâm lii kuldâlmist tääbbin saajeest 1:12:04. Ääšist savâstâllâm kávnoo siämmáá liiŋkâst.
Taankiärdásâš kaavaiävtuttâs lâi mottoom verd muttum ovdebáá iävtuttâsâst: hooteelhaahâ lâi ucedum já ton lasseen lâi adelum laseselvâttâs pasâttâsčasij kieđâvušmist. Iävtuttâsân lâi lasettum meid muulsâiähtu tupekylást, mon puávtáččij huksiđ tááláá kaava vuáđuld-uv.
Eennâmomâsteijee lâi oovdânpuáhtám iävtuttâs taan kaavan toohâđ máhđulâžžân vuáđudiđ ollâ tääsi joskâdvuođâ kunnijâttee luándumađhâšemkuávlu.
Käldee:
– Inarin kunnanvaltuusto hylkäsi Veikko Lesosen hotellihankkeen kaavan yhden äänen enemmistöllä jo toisen kerran (yle.fi)
Peividum 24.9. Pirita Näkkäläjärvi säänih: vááimuskuávlu, ij váldukuávlu.
Kove: Marja-Liisa Olthuis