Aanaar kieldâliih láá meid taan ive peessâm meridiđ 10 000 euro meriruuđâ kevttimist uásálistee budjetistmist. Kieldâliih láá jienâstâm 17 jootkân peessâm iävtuttâsâst olssis mielâsii kevttimulme.
Jienâstmist pyeremustáá piergejii čuávuvááh iävtuttâsah:
- Sávrudâttâmporthááh Aanaar markkânân
- Sávrudâttâmporthááh Suáluičiälgán
- Avveel sierâdemsojij ovdedem já rijjâääigi luistâlemrađe huksim Avelân
Aanaar markkân sávrudâttâmporthááh vuoittii uásálistee budjetistem jienâstem, já 10 000 euro ruttâsumme kiävttoo taan haavâ oovdedmân. Sávrudâttâmporthái saijeen lii smiettum Onnenkukkula kaskoo siijdâ. Siämmáá saajeest lii meid láávu, olgohiivsig já lätteeráánui poossâmsaje keessiv.
Jis vuáváámijn puátá oovdân, et šiev porthái huksim váátá stuárráb budjet, te kieldâ väärrid taam váiloo uási puáttee ive budjetân.
Jienâstem lâi čovgâd. Vyeittee iävtuttâs finnij 16,27 % puoh jienâin. Jienâstiđ puohtii taan ive 12 ihheed tevdee teikâ tađe puárásub aanaarliih. Uásálistee budjetistmist adeluvvojii taan tove ohtsis 338 jiennâd.
Aanaar kieldâ ornij tääl uásálistee budjetistem viiđâd tove. Ive 2022 jienâstem vuoitij 73 jienáin iävtuttâs haahâđ astoäigipiergâsijd tuárispel sijdáid. Taat iävtuttâs ij vaattâm ubâ sume, nuuvt et nubben šoddâm iävtuttâs, Avveel Jieggivääri kuávlu ovdedem, puovtij ovdeduđ loppâruđâigijn.
Uásálistee budjetistem lii toimâvyehi, mast kieldâliih váldojeh fáárun ohtsâš viäruruuđâi kevttimân kyeskee savâstâlmân, vuáváámân já meerridmân. Tyehin lii juurdâ njuolgâ já uásálistee demokratiast, mast ässeeh merideh, maht kieldâ almoliih ruuđah kiävttojeh. Uásálistee budjetistem lii ohtâ vyehi ovdediđ kieldâlij uásálistem.
Käldeeh:
– Osallistuva budjetointi (www.inari.fi)
– Inarin kunnan osallistuvan budjetoinnin äänestys ratkennut – Esitys kuntoportaista Inarin kirkonkylälle voitti (www.inari.fi)
Kove: Fabrizio Brecciaroli