Skábma – Snowfall lii videospellâ, mii lii uážžum inspiraatio sämmilii kulttuurist já sämmilijn mainâsijn. Spellâ lii tääl iävtukkâssân Nordic Games Awards ‑kištoost, mii lii tárguttum tave-eennâmláid spelláid. Ovdil Skábma – Snowfall lâi iävtukkâssân Suomâ pyeremussân spellân The Finnish Game Awards ‑kištoost. Tot vuoitij ive 2022 palhâšume Suomâ pyeremussân kreatiivlâžžân spellân. Tamperelâš spellâirâttâs Red Stage Entertainment lii vuávám speelâ.
Skábma – Snowfall lii fantasia- já mainâsspellâ. Speelâ vuávájeijeeh láá jiejah ráhtám speelâ juonâ, veikkâ eres ulmui vuáttámušah láá movtijdittám speelâ rähtimist. Mainâseh láá nurrum pirrâ Säämi. Siämmáá mainâsist kávnojeh távjá eenâb ko ohtâ versio. Speelâ vuáváámist mainâs uásih láá valdum tiebbin tääbbin, já toh láá ovtâstittum ohtân mainâsin. Ton lasseen, ete speelâ tyehin lii sämikulttuur, taat lii meiddei vuosmuš tohe, ko stuorrâ videospellâ lii jienâčaittâlum ollásávt tavesämikielân.
Juonâ álgá tast, ko nuorâ puásuikeččee Áilu kávná puáris já vájáldittum nuáidiruumbu. Sun aalgât pálgás, vâi sun šodâččij uáinojeijen já pyeredeijen. Speelâ visuaallâš peeli lii muččâd. Speelâst láá ovdâmerkkân ennuv mučis enâduvah tavekuávlu luándust.
Ohtâ spellâirâttâs vuáđudeijein já speelâ vuávájeijein, Marjaana Auranen, lii jieš sämmilâš. Sun uáiná, ete spellâ lii pyeri vyehi siäiluttiđ já paijeentoollâđ kielâ já kulttuur. Nuoráid spellâmaailm lii uápis, já ko speelâ kielâ lii tavesämikielâ, te tot lii tehálâš eromâšávt tavesämikielâláid nuoráid.
Spellâ lii spellâmnáál tiäturáin, já tom puáhtá uástiđ spellâkaavpijn neetist. Vuáváámeh láá, ete spellâ almostuvá meiddei konsolspellân aldapuátteevuođâst.
Nordic Games Awards ‑kišto eehidjuhle (gaala) uárnejuvvoo vyesimáánu 25. peeivi Malmöst Ruotâst. Skábma – Snowfall lii nomâttum iävtukkâssân kyevti kategoriast: tave-enâmij pyeremus spellâ já pyeremus taaiđâ.
Käldeeh:
– Saamelaisten tarinoista ammentava suomalaispeli on saanut runsaasti huomiota maailmalla – oli vaikea valinta tehdä peli oman kulttuurin traumoista, sanoo käsikirjoittaja (www.hs.fi)
– PAKO Highway valittiin vuoden 2022 parhaaksi suomalaiseksi peliksi The Finnish Game Award -gaalassa (neogames.fi)
– Adventure game | Skábma – Snowfall (www.skabma.com)
– Nordic Game Awards • Nordic Game 2023 (conf.nordicgame.com)
Kove: Tuula Ylänne