Koroneia-jävri, ovdil ohtâ Kreika vijđásumos jaavrijn, lii lamaš jotelávt lappuumin majemui iivij. Vala love ihheed tassaaš Koroneia lâi nyevt 34,4 neljihâškilomeetter stuárusâš. Tääl tot lii tuše 2,7 neljihâškilomeetter stuárusâš. Kreikkaliih luándutotkeeh eteh, et uáivisuijâ jäävri uccomân lii, et šoŋŋâdâhnubástus keežild kuávlust ij innig arve siämmáá ennuv ko ovdil.
Majemuu viiđâ ive koskâmiärálâš arvemeeri lii lamaš 400 millimeetterid ivveest. Ovdebái luuvij iivij koskâmiärálâš arvemeeri lâi nyevt 550 millimeetterid ivveest. Kiäppánâm arvemeerij lasseen šoŋŋâdâhnubástus keežild jäävri lievlistem lii lasanâm 100–150 millimeetteráin ivveest, iätá Kreika aalmuglii nješšikuávdáá pargee Dimitris Papadimos Reutersân.
Jäävri tile taha viärráábin tot, et ko ij arve tuárvi, te eennâmviljâleijeeh kevttih jäävri čääsi šadoi šoddâdmân já elleidis juuvâtmân.
Koroneia lâi ovdil tehálâš saje tuháttáid kesiluddijd, ovdâmerkkân flamingoid. Ton lasseen tot lâi pyeri saje kuálásteijeid já eennâmviljâleijeid.
Käldee:
– Greece’s vanishing lake exposes rapid impact of climate change (www.reuters.com)
Kove: Anastasiya Lvova (CC BY-SA 4.0 / Wikimedia Commons); Raijim: Valtteri Valkeapolku