Anarâš aavis čaalij čohčuv 2025 tast, et kulmâ Tave-Laapi kieldâ láá áigumin sajanmäksiđ nuorâ pargei uáppuloovnâid. Ulmen lii hogâttâllâđ eskenvalmâštum ulmuid kuávlun já pargoelimân. Tääl taat iskâstem lii joođoost já iävtuh sajanmäksim finniimân láá čielgâseh.
Aanaar, Suáđigil já Ucjuuvâ kieldah láá algâttâm kulmâ ive pištee uáppuloovnâ sajanmäksimiskâstem, mast kieldân värrejeijee já tobbeen pargee olmooš puáhtá finniđ uáppulovnâsis sajanmáávsu maaŋgâ tuhhát euro oovdâst.
Iskâstem lii uáivildum áámmát- teikâ ollâškoovlâst valmâštum ulmuid. Occest kalga leđe uáppulovnâ, já sun kalga tevdiđ iiskâstmist adelum iävtuid eereeb iärrás valmâštumääigi, aassâm já pargoeellim iähtun. Sajanmáávsu enâmus meeri lii 5 800 eurod. Iiskâstmân pyehtih uuccâđ tagareh ulmuuh, kiäh láá valmâštum enâmustáá kyehti ive ovdil vuosmuu uuccâmperiod. Tođhos puáhtá leđe áámmátlâš tođhos, áámmátollâškovlâtođhos teikâ ollâopâttâhtođhos.
Sajanmáávsu iähtun ij lah tot, et occee ferttee porgâđ tavekuávlu kieldâ palvâlusâst. Pargo porgâmsaje teikâ káidustoimâpäikki ferttee liijká leđe Anarist, Suáđigilist teikâ Ucjuuvâst. Meid irâtteijeeh pyehtih peessâđ fáárun iiskâstmân. Sajanmáávsu finnim iähtun lii ucemustáá 50 prooseent pargoäigi já 12 mánuppaijeed pištee pargo. Sajanmáávsu puáhtá finniđ enâmustáá kuulmâ ihán, já tot occoo maajeeldkietân jyehi 12 máánu periodist. Vuosmuuh ucâmušah kieđâvuššojeh kieldâin uđđivemáánust 2027.
Iiskâstmist váldoo huámášumán meid raajijd rastaldittee pargo. Taažâst pargoost leijee ulmust sáttá leđe vuoigâdvuotâ sajanmááksun, jis suu aassâmkieldâ lii Aanaar teikâ Ucjuuhâ.
Tavekuávlu kieldâi uáinust saahâ lii áámmáttáiđusii pargovievâ finniimist. Nuorâ vuorâsulmui rekrytistem ruuđáin lii ohtâ vástádâs toos, et siämmái ulmui áámmáttááiđust kištottâlloo pirrâ Suomâ. Ruđâlâš toorjâ sáttá toohâđ aassâmsaje valjim älkkeebin eidu ton muddoost, ko nuorâ olmooš lii eidu valmâštum já taha miärádâsâid aassâmsaijees valjiimist já pargoelimân lavkkiimist.
Uáppuloovnâ sajanmäksimravvuuh kávnojeh Aanaar kieldâ siijđoin.
Käldee:
– Opintolainan hyvitystä voi hakea kolmessa Lapin kunnassa – summa voi olla tuhansia euroja (yle.fi)
Kove: Marja-Liisa Olthuis