Puijon Hiihtoseura vuoitij kole Aanaar SM‑kištoi almai 4×10 km viestâst aigijn 1.32.53,3. Juávhu vuossâmuš čyeigee lâi Perttu Hyvärinen. Nubbe uási čoovdij kišto, tastko Iivo Niskanen čuoigâi juávkkusis nuuvt korrâ njunošsaje, ete Petteri Koivistost já Niilo Mäkisiist lâi älkkee toollâđ tom loopâ räi.
Jämin Jänne (Markus Vuorela, Ristomatti Hakola, Niko Husu já Lauri Lepistö) vuoitij siilbâ. Vuokatti Ski Team Kainuu (Juuso Mäkelä, Eero Rantala, Emil Liekari já Veeti Pyykkö) taištâlij olssis proonsi.
Puijon Hiihtoseura čyeigei Hyvärisâžân Aanaar viestâ lâi karrieer majemuš viestâkišto. Anarâš aavis koijâdij suu smiettâmušâid. Henna Tervaniemi sahhiittâlâi.
– Liihân taat fiijnâ äšši, ete puáhtá lopâttiđ karrieer Suomâ miäštárin viestâst. Almaažiih postii orniđ munjin suotâs olâttâs. Pyeri meid siärván já Kuopion. Mij irâttep pissoođ fáárust Kuopio miänástusâst, Hyvärinen pahudij. Sun čujottij toos, ete Kuopio lii majemui iivij vuáittám SM‑kole ovdâmerkkân jieŋâskiärust já jyelgipáálust.
Kuopio almai ihástâlâi Aanaar.
– Tisthân páštá piäiváš já lii ubâ muotâ. Jiem lah uáinám Kuopiost muottuu kuhes ááigán. Kuopiost láá puáttám ennuv ulmuuh, te ij vaarâ tađe pyereeb pyevti leđe. Saaveehlätteeh láá kuittâg tuárvi vätteeh, jiem veltihánnáá innig taan muddoost tarbâšiččii návt vättee. Mutâ siämmáš lii tääl moonnâđ loopâ räi. Amahân mun itten vuálgám [50 km kiišton] navdâšiđ, Hyvärinen eeđâi.
Kišto ovdánem
Almai 4×10 km viestân uásálistii 24 juávkkud. Vuosmuuh kyehti uási čuáigojii ärbivuáválijn vuovvijn jeđe kyehti majemuu vist rijjâ vuovvijn.
Jämin Jänne čyeigee Markus Vuorela poođij vuosmuu molsomân vuossâmužžân. Talle njunošjuávkun kullii Leevi Tarjanne (Espoon Hiihtoseura, +7,9), Lauri Mannila (Taivalkosken Metsä-Veikot 85, +8,4,) já Perttu Hyvärinen (+9,1). Niilo Moilanen (Pohti SkiTeam Pyhäjärvi 1, +21,2) já Topias Kemppi (Inarin Yritys 1 Pohjolan OP, +21,9) čuávuin maajeeld.
Nubbe uási muutij puoh ko Iivo Niskanen muttij kištokuoimijdis. Niskasii hirmos čuoigâm maŋa tuše Jämin Jänne ovdâsteijee Ristomatti Hakola pisoi vuálá miinut keččin Puijon Hiihtoseurast, mutâ sun-uv poođij nube molsomân 46,8 sekuntid maajeeld. Espoon Hiihtoseura (+2.53,2) já Taivalkosken Metsä-Veikot 85 (+3.33,5) paccii kuhás, já uđđâ pronssičyeigen pajanii kuulmâs: Alexander Ståhlberg (IF Minken 1, +1.11,2), Niko Anttola (Proski Oulu 1, +1.11,7) já Jeremias Lipsanen (Inarin Yritys 1 Pohjolan OP, +1.12,0).
Kuálmád uásist tile ij jur muttum. Majemuu uásán kollejuávhu Niilo Mäkinen vuolgij 52,2 sekuntid ovdil silbâjuávhu Lauri Lepistö. Lepistö čuoigâi liijká korrâ liävttoin, tastko sun poođij moolân tuše 12,8 sekuntid Mäkisii maŋa. Ko kolle- já silbâmiitaal puáđus lâi čielgâs, te ulmuuh vuoijuu pronssitaištâlmân.
Inarin Yritys 1 Pohjolan OP ‑juávhu aŋkkur Anton Kemppi lâi čuoigâm sitkásávt kuálmádin. Sun luhostui kočâttiđ Proski Oulu 1 ‑juávhu aŋkkur Aleksi Parttimaa, kote lâi čuávvum suu kuhháá. Mutâ Arsi Ruuskanen (Kuusamon Erä-Veikot 1) já Veeti Pyykkö (Vuokatti Ski Team Kainuu), kiäh vuolgijn jieijâs uásán paijeel 40 sekuntid Kemppi maŋa, iävá luovâttâm. Selvâtteijee, juávkkukuoimij já keččei čuárvudijn Pyykkö čuoigâi moolâviijve rasta 0,2 seekunt ovdil Kemppi. Ruuskanen paasij pettâšum Aanaar juávhu aŋkkurist 3,3 seekunt.
Pohti SkiTeam Pyhäjärvi šoodâi Suomâ Cup viestâmiäštárin
Pohti SkiTeam Pyhäjärvi poođij SM‑viestâst esken čiččâdin, mutâ tast huolâhánnáá juávkku vuoitij Suomâ Cup viestâmiäštárvuođâ 712 čuággáin. Nubben poođij Jämin Jänne (610) já kuálmádin vist Vuokatti Ski Team Kainuu (556). Soojijn 4.–6. pottii Puijon Hiihtoseura (526), Imatran Urheilijat (496) já Inarin Yritys (402).
Käldee:
– Iisalmen Visa historialliseen naisten viestikultaan – Puijon Hiihtoseura palasi miesten viestimestariksi (hiihtoliitto.fi)
Artikkâlkove: Valtteri Valkeapolku