Čuoigâmpaje 2025–2026 majemuuh SM- já Suomâ Cup ‑kištoh uárnejuvvojeh cuáŋuimáánu 10.–12. peeivi Anarist Juvduuvääri čuoigâmstadionist. Kištoid uásálisteh maaŋgah syemmilii čuoigâm njunošeh. Koččâmušâst lii ohtâ 150-ihásii Aanaar kieldâ juhleive njunoštábáhtuumijn. Anarâš aavis čuávu kištoid pääihi alne.
Vástuppeeivi 10.4. vuárust láá ärbivuáválii čuoigâm uánihub määđhih: nisonijn 5 km čuoigâm (tme 11.15) já almain 10 km čuoigâm (tme 13.00).
Lávurduv 11.4. čuáigojeh viestah. Nisonij 3×5 km viestâ álgá tijme 12.00, já almai 4×10 km viestâ vist tijme 13.30.
Majemuu kištopeeivi ađai pasepeeivi 12.4. kištottâlloo ärbivuáválii čuoigâm kuhebijn maađhijn. Nisoneh iäljárušeh Juvduuvääri vieltijn ohtsis 30 km (tme 9.45) já almaah 50 km (tme 12.45).
Sehe vástuppeeivi já pasepeeivi ärbivuáválii čuoigâmist láá koskâäigivuolguuh. Tot meerhâš tom, ete čyeigeeh vyelgih joton miinutpele kooskâi já sii lopâliih sajeh mitteduvvojeh tijmijn.
SM-mitalij lasseen jyehi šlaajâst láá jyehimnáál Suomâ Cup majemuuh čuággáh. Viiđâ kišto (Vuokatti, Ruka, Kuopio, Tampere, Ruávinjargâ) maŋa sehe almai já nisonij olespuátusijn lii čielgâ njunoš. Almain vuossâmužžân lii Markus Vuorela 304 čuággáin. Nubben puátá Ike Melnits, 80 čyegisid Vuorela maajeeld. Nisonijn njunošist lii Hilla Niemelä 418 čuággáin. Suu iäru nubben puáttee Amanda Saarin lii joba 126 čyegisid. Uásikištoi vyeittee finnee 100 čyegisid, nubbe 80 čyegisid, kuálmád 60 čyegisid já nuuvt ovdâskulij. Kulmâlovváád čyeigee finnee oovtâ čuággá.
Kištoi orniimân láá uásálistám loveh talgoopargeeh
Aanaar SM-kištoi orniimist västid vuáimáštâllâm- já valastâllâmservi Inarin Yritys. Anarâš aavis sahhiittâlâi koskoho kaskoo ornimhuápui seervi saavâjođetteijee Kari Perätalo. Sun muštâl, ete kištoi sundáttâllâm lii álgám jo suullân kyehti ive tassaaš ko sij finnejii tiäđu tast, ete SM‑čuoigâm máccá Anarân.
Talgoopargoh piäijojii joton vyesimáánust 2025 ovttáin vuároin ohhoost, já toid uásálistii 6–10 olmožid. Njuhčâmáánu rääjist talgoojuávkku čokkânij kuohtii ohhoost, já tääl majemui ohoi vuárui já pargei meeri lii lasanâm čuuvtij.
– Pessijâšvuossaargâ mij lâim paijeel 30 olmožid, jieht [majebaargâ] suullân 35 olmožid já onne [koskoho] suullân 40 olmožid. Valmâštâlmeh ovdáneh uáli jo pyereest. Onne mij lep kiässám luuvijd kilomeetterijd kaabel miäcán [Yle kamerai várás], Perätalo čielgee.
Perätalo tuáivu, ete kištoin pääcih pyereh muštoh puohháid. Puoh tehálumoseh láá tiäđust-uv kištottelleeh.
– Čyeigeeh láá njunošäšši. Ete mij pastaččijm orniđ sijjân täsipiälásijd tiilijd, Perätalo iätá.
Tábáhtus lii keččeid nuuvtá. Kištoid puáhtá čuávvuđ stadionkuávlu keččeesoojijn sehe meecist merkkejum pálgái alne. Stadionkuávlust lii meid stuorrâ ruuvdu, mii čáittá Yle njuolgâvuolgâttâs. Čuoigâmstadionist vuábdojeh jieškote-uvlágáneh purrâmušah já juhâmušah, maid puáhtá uástiđ korttáin já kietâruuđáin.
Oovdeb tove čuoigâm SM‑kištoh uárnejuvvojii Anarist ive 2023. Meid talle Anarâš aavis lâi fáárust čuávumin kištotubdâmušâid.
Käldeeh:
– Hiihdon SM 2026 (inarinyritys.net)
– Inari 10.4.2026 – 12.4.2026 (hiihtoliitto.fi)
Kove: Valtteri Valkeapolku
Uuđâs peividum 10.4.2026 tme 17.31: lasettum kove Kari Perätalost