Finnair ornij Milanost mediakonferens, moos uásálistijn finnoduv Euroop kuávlu kávpálâš hovdâ Geoffrey Carrage sehe Suvi Aaltonen Finnair viestâdmist. Tábáhtus ääigi kirdemfinnodâh tieđettij merhâšittee viijđedmist Italia markkânáid: keessiv 2026 Finnair áigu kirdeđ oovce čuosâttâhân ohtsis 58 kirdemid jyehi oho. Tot lii 20 prosentid eenâb ko tijmá.
Kuávdáš uđđâ čuosâttuvah láá Catania (toimâmist jo), Firenze (kirdemeh älgih taan máánust, enâmustáá nelji kirdem ohhoost) já Torino (piäijoo joton vyesimáánu 3. peeivi kulmáin kesikirdemáin).
Finnair kirdá ain ubâ ive jo ovddiist uápis čuosâttuvváid ađai Malpensa kiädán Milanost já Fiumicino kiädán Roomast. Toi lasseen Finnair kirdá seesoongääigi Napolin, Bolognan, Venetsian já Veronan.
Finnair háputtâl stuárráb sajattuv meid Tave-Euroopist. Vuáváámist láá uđđâ kirdemeh Altan Taažân sehe lasekirdemeh Tromssan já meid kirdemkoskáid Kittâl–Avveel–Kirkkonjargâ já Helsig–Tave-Taažâ. Ton lasseen tälvikirdemeh ovtâstitteh Bryssel, Zürich já Pariisi Kittâlân já Ruávinjaargân. Aalmugijkoskâsávt kirdemfinnoduv kuávdáást láá kirdemeh Japanân (28 kirdemid ohhoost), Thaienâmân (25), Toronton (vyesimáánust) já Melbournen (álgá roovvâdmáánust Bangkok peht).
Finnair áigu investistiđ ive 2029 räi 2–2,5 miljard eurod Embraer E195-E2-mašináid (joba 46 mašinid) já Airbus A320neo-mašináid. Meid ruánáá mittomereh láá teháliih: ulmen lii kevttiđ 10 prosentid kilelis kirdempuáldámuš já kepidiđ čiđđâdioksid 34,5 prosentáin ihán 2033.
Ko Geoffrey Carragest koijâdui, maht tääl tábáhtuvvee maailmvijđosiih tuáruh vaigutteh finnoduv strategian, te sun västidij: ”Mij lep sitkáseh, tego koronavirus já Ruošâ áimusaje kiddim láá čáittám. Mii tááláš strategia tiptá mii navigistiđ geopooliitlii epivisesvuođâ kooskâst vuájumáin Tave-Euroopân já näpikiärdukiäinoid. Aldanuortâ tuárui vaiguttâs ij lah nuuvtkin merhâšittee: mij tuše koskâlditijm kirdemijd Dohan [toim. huám. Qatarist], epke mij kirde Iran já Syyria áimutiileest.”
Italia lii ain tehálub strategisâš markkân: syemmiliih ihásteleh ”Belpaese” (’mučis eennâm’, tivtâlâš nommâ Italian), já Finnair haalijd pyehtiđ eenâb italialijd keččâđ Suomâ luándu, koskâkeesi piäiváá, kuovsâkkâsâid já pegâlmâs luholâšvuođâ – faallâđ sijjân fiäráán syemmilâšvuođâ váimusist.
Kove: Gianfranco Nitti