Anarâš aavis uđđâsumos blogist ađai Kođđeemblogist lii šoddâm Tuoijumblogi. Nubástus suijân lii tot, ete kođđeem lii ohtuunis viehâ räijejum fáddá ige tast čalluu nuuvt ennuv. Toimâttâskodde ij uáinám ulmemiäldásâžžân toollâđ blogi tuše kođđeem várás, peic mij halijdep faallâđ vijđásub areena čälimân.
Tuoijumblogin uážžu ain čäälliđ kođemist, mutâ tääl lii máhđulâš kieđâvuššâđ meiddei eres tuojijd. Lijkkuuh-uv tun verâmân, kuárumân, mááláámân, rävdijâšmân teikâ monnii eres tuáján? Jyevi peri jieijâd puátusijd já keččâlmijd eres lohhei illoon!
Mij tuáivup, ete taat nubástus movtijditáččij lase ulmuid čäälliđ aavisân. Jieijâs čalluid puáhtá vuolgâttiđ toimâttâsân šleđgâpostáin. Ohtâvuotâtiäđuh kávnojeh tääbbin.
Jis tust láá eres iävtuttâsah tast, maht Anarâš aavis kolgâččij ovdeduđ, te tun puávtáh vuolgâttiđ šleđgâpoostâ teikâ väldiđ ohtâvuođâ aavis Ideanurhe peht.
Kove: Valtteri Valkeapolku