Ringette maailmmiäštárkištoh uárnejuvvojii Lahtist 3.–9. peeivi. Kištoin spiällojii kulmâ rááiđu: rävisulmui válduráiđu Sam Jacks Pool já vyeliráiđu President’s Pool sehe vuálá 21-ihásij ráiđu Juuso Wahlsten Pool. Luuvâ tärhibeht kištovuáháduvâst tääbbin.
Suomâ vuoitij kole sehe Sam Jacks Poolist já Juuso Wahlsten Poolist. Rävisulmui MM-kolle lii Suomâ oovcád maŋaluvâi. Suomâ lii tääl vuáittám puoh rävisulmui miäštárvuođâid ive 2004 rääjist.
Sam Jacks Pool vuossâmuu finalist Suomâ vuoitij Kanada 4–2. Nube finalist Kanada paajij vuosmuu moolâ, mutâ tast maŋa Suomâ lavkkij njunošân. Speelâ pelimuddoost lovoh lijjii jo 4–1. Niäljád adai majemuu uási aalgâst Suomâ lâi njunošist 7–1. Kanada finnij vala kyehti moolâ, mutâ toh pottii liijkás maŋŋeed, já nuuvt Suomâ šoodâi miäštárin lovoiguin 7–3.
Ohtâ Suomâ sáŋgárijn lâi Ida Adler, kiäs taah kištoh lijjii vuossâmuuh eennâmjuávhust. Adler paajij kulmâ moolâ já falâlij kyehti moolâ. Nube fiinaal maŋa sun väljejui speelâ puoh pyeremussân spellen já kištoi puoh mávsulumos spellen Suomâ juávhust. Adler lâi tuđâvâš toos, ete sun luhostui pääččiđ moolâid já ete pääihi alne lijjii ennuv keččeeh sehe suu skipáreh já peerâ.
Meiddei Juuso Wahlsten Pool vuosmuu finalist Suomâ vuoitij Kanada 4–2. Nube finalist Kanada lâi pyereeb lovoiguin 4–3 já tassij vuáituid. Nuuvtpa tállán spellui vala jotkâuási, mon Suomâ vuoitij 3–1.
Ringette taarbâš lase enâmijd
Talle ko Suomâ já Kanada kištottellii rävisulmui já vuálá 21-ihásij kolleest, te Ruotâ, Tšekki já Ovtâstum staatah spellii President’s Poolist jieijâs kištoid. Ruotâ vuoitij puoh algâspelâidis já peesij njuolgist finalân. Ton vuástá poođij Ovtâstum staatah, mii lâi vuáittám Tšeeki 8–5 pelifinalist. Fiinaal nuuvâi Ruotâ 8–7-vuáitun jotkâääigi.
Čuávuvááh kištoh uárnejuvvojeh Kanadast 2027. Ringette tarbâšičij fáárun lase enâmijd, vâi speelâi tääsi pisoččij pyerrin já vâi kolleest spelâččii eres-uv enâmeh ko tuše Suomâ já Kanada. Čuávuváin kištoin uđđâ enâmeh iä vala lah, mutâ pargo ton oovdân juátkoo.
Käldeeh:
– Suomi voittaa toisen finaalin 7-3 ja palkitaan ringeten maailmanmestariksi (www.worldringette.com)
– Suomi teki sen jälleen! Ringettemaajoukkueelle jo yhdeksäs peräkkäinen MM-kulta (yle.fi)
– Suomi on Alle 21-vuotiaiden ringeten maailmanmestari! (www.worldringette.com)
– Ruotsi President’s Poolin mestariksi jatkoajan trillerissä (www.worldringette.com)
Kove: Jani Virolainen