Ringette maailmmiäštárkištoh spiällojeh Lahtist skammâmáánu 3.–9. peeivi. Jieŋâspeelâst, mast Suomâ já Kanada láá mielâttes ennuv pyerebeh ko eres juávhuh, lii eromâš kištovuáhádâh.
Ringette MM-kištoid uásálisteh vittâ eennâm: Suomâ, Kanada, Ruotâ, Ovtâstum staatah já Tšekki. Siämmáá ääigi spiällojeh meid vuálá 21-ihásij kištoh, moid uásálisteh tuše Suomâ já Kanada. Jo kištoi aalgâ rääjist lii vises, ete kuohtuin kištoin kole vuáittá jo-uv Suomâ teikâ Kanada.
Suijân eromâš kištovuáhádâhân lii tot, ete Suomâ já Kanada láá čielgâsávt pyerebeh ko eres juávhuh. Tääl ucebeh ringette-enâmeh iä taarbâš spellâđ kištoin tušes speelâid, maid toh kuittâg ain táppááččii, peic toh pyehtih spellâđ tagarij juávhui vuástá, moh láá siämmáá tääsist.
Rááiđuh láá kulmâ:
- Sam Jacks Pool lii válduráiđu. Tast Suomâ já Kanada spellih kyehti speelâ já čuávdih miäštárvuođâ. Ráiđu lii nobdum kanadalii Sam Jacks mield, kote ovdedij ringette ive 1963.
- Juuso Wahlsten Pool lii vuálá 21-ihásij ráiđu. Tast-uv Suomâ já Kanada spellih kyehti speelâ já čuávdih vuálá 21-ihásij miäštárvuođâ. Ráiđu lii nobdum syemmilii Juuso Wahlsten mield, kote puovtij ringette Suomân ive 1979.
- President’s Pool lii rävisulmui vyeleeb ráiđu, mast spellih Ruotâ, Ovtâstum staatah já Tšekki. Jyehi juávkku spiällá kuohtii eres juávhui vuástá. Ton maŋa spiällojeh vala pelifiinaal já fiinaal. Keevâtlávt fiinaalspeelâ vyeittee vuáittá MM-proonsi.
Suomâ lii ringette njunošeennâm
MM-kištoh láá uárnejum taan vuáháduv mield jo ive 2013 rääjist. Suomâ lii vuáittám uđđâ vuáháduv puoh rävisulmui miäštárvuođâid, ohtsis vittâ kole. Majemuin 12 kolleest Suomâ lii vuáittám love. Kanada lii ferttim jo kopijistškyettiđ syemmilii ringette, vâi sij piergiiččii syemmiláid.
Suomâ uáivivälmejeijee Pasi Kataja iätá, ete miänástusân ij lah tiätu suijâ.
– Suomâst lii porgum pyeri pargo. Spelleeh láá uáli áámmátlágáneh já čonnâsâm sehe aalmuglii já aalmugijkoskâsii tääsist. Mist lii tuše ohtâ ulme: vyeittiđ. Já mij porgâp puoh ton oovdân. Tast ij taarbâš ubâ sárnuđgin, Kataja iätá.
Suomâ tááláá juávkun láá puáttám ennuv uđđâ spelleeh nuorâi juávhust, já motomeh ovdebeh njunošspelleeh, tego Susanna Tapani já Anne Pohjola, láá meddâl. Tääl lii-uv kiddejum ennuv huámmášume juávkkujiegân.
– Mij lep tääl tuođâi čapo juávkku. Ko láá puáttám nuuvt ennuv uđđâ spelleeh, te mij lep huksiiškuáttám juávkkujiegâ-uv. Mist lii ain hävski, já tot uáinoo meid jieŋâ alne, iätá Suomâ nubbe värikapteen Hanna Ovaska.
Ohjelm já speelah taan räi
Kuohtuin miäštárvuotârááiđuin láá spellum kyehti čááitusspeelâ. Suomâ lii vuáittám Kanada puoh speelâin. Kyehti fiinaalspeelâ spiällojeh lávurduv já pasepeeivi. Vuálá 21-ihásij finaleh älgih tme 15 lávurduv já tme 13.45 pasepeeivi. Rävisulmui finaleh vist älgih tme 18 lávurduv já tme 17.45 pasepeeivi. Yle čáittá rävisulmui finalijd TV2:st já Areenast.
President’s Pool ‑rááiđust láá spellum vittâ speelâ. Ovtâstum staatah vuoitij Tšeeki 12–0 já 6–3. Ruotâ še vuoitij Tšeeki 7–4 já 11–4. Ruotâ vuoitij meid Ovtâstum staatâid 7–5. Algâspeelâi majemuš spellâ adai nubbe USA–Ruotâ-spellâ spiälloo onne. Pelifiinaal lii lávurduv tme 11, já fiinaal lii pasepeeivi tme 9.45.
Speelah spiällojeh Lahtist, Keravast já Helsigist. Puoh fiinaalspeelah spiällojeh Lahti jieŋâhaalist Wemasto Areenast.
Käldeeh:
– Ringettemaajoukkueen ylivoima pakottanut Kanadan matkimaan Suomea – lajin valtikka jaossa Lahdessa (yle.fi)
– Turnausformaatti (www.worldringette.com)
– Ottelut (www.worldringette.com)
Kove: Saruwine (Wikimedia Commons)