Oovdeb tove mun muštâlim lääigist, mon mun ostim Ylivieskast. Tast tun puávtáh luuhâđ tääbbin. Veikkâ lääigi mun lijjim-uv jieš meridâm, te tiptim muu nieidâ valjiđ ton ivne. Läigi lii Sandnes Garn Duo, já ivne lii Magenta. Läigi lii merinoulo já pumbul siävuttâs, mii taha tast uáli times. Ton lasseen tast rahtum kođosijd lii vuovâs anneeđ. Pumbul lii times, já merinoullo lii kuittâg liegâs. Läigi lii meid suotâs já jotteel kođđeeđ. Duo-lääigist kuđđum kođosijd puáhtá meid poossâđ posâlemmašinist ullo-ohjelmáin.
Taaki malli lâi munjin uápis jo muuneeld. Malli lii Little & Loop Cherry Jacket. Mun lam kođđáám siämmáá maali mield párnái ullotaaki jo kuohtii ovdil. Ravvuuh láá älkkeeh, veikkâ toh láá-uv eŋgâlâskielân, já toi luuhâm heivee tondiet pyereest meid autoporgâmuššân. Algâalgâlâš malli lii čallum tárukielân, já eŋgâlâskielâ lasseen tom uážžu meid tanskakielân. Algâtteijee-uv selvân ravvuin älkkeht, ko toh láá oovtâkiärdáneh já celkkuuh láá uánihááh.
Takki valmâštui mudágávt Kuopiost, já mun peessim uástiđ puáluid munjin oovtâ mielâsumos kietâtyejikáávpán, Nappi ja Nauha ‑puuvdân Kuopiost. Tobbeen lii ohtâ seini tievâ jieškote-uvlágánijn puáluin. Nieidâ jieš peesâi muin valjiđ puáluid, mut loopâst taaiđij-uv leđe eeči, kote kaavnâi puoh muččâdumos puáluid ullotaakin.
Kilomeettereh láá auton puáttám ennuv taan keesi, já vala-uv mätki juátkoo. Must láá kođđeemsaagijn tääl jo taan keesi čuávuvááh Párkku-suháh. Toh láá puátimin kállásân lääigist, mon mun meid ostim Ylivieskast. Áinoo läigi, mon mun lam uástám tuše noomâ tiet. Läigi lâi Pro Lana Business bamboo. Bambuläigi tast ij kuittâg lah, peic läigi lii ulo, viskoosi já polyamid siävuttâs. Mut tobdo lii mielâttes times já sillee. Sárgái várás mun kiävtám oppeet motomijd pasâttâslaaigijd jieččân vuárhást. Jispa talle toh-uv motomin noheh, já mun peesâm oppeet mottoom läigikáávpán.
Kesiääigi mun lam tuođâi tääl kavnâm oppeet kođđeemmoovtâ, ađai vissásávt taan čoovčâst šadda eromâš pyeri kođđeemčohčâ. Tääl kođđeeđ já mušteđ kođđeeđ meid anarâškielân!
Koveh: Henna Tervaniemi