Ive 2025 Euroviisuh-lávlumkišto uárnejuvvoo taan ohhoost Sveeici Baselist St. Jakobshallest. Lávlumkišto selvâttuvvoo meiddei anarâš- já tavesämikielân tego kyevti ovdebáá-uv ive. Anarâškielân Euroviisuid seelvât Heli Huovinen já tavesämikielân Aslak Paltto. Suoi selvâttává kišto Pasilast Helsigist.
Vuosmuš semifiinaal uárnejuvvoo majebaargâ 13. peeivi tijme 22 Suomâ ääigi. Vuosmuu semifiinaal sämikielâg čielgim kávnoo tääbbin. Vuosmuu semifinalist lávlu KAJ-lávlumjuávkku, mii puátá Suomâ peln Vöyrist mut oovdâst Ruotâ. KAJ-juávhu lavluu nommâ lii Bara bada bastu. KAJ-lávlumjuávkun kuleh Kevin Holmström, Axel Åhman já Jakob Norrgård. Vuosmuu semifinalist lávluh 15 enâmid. Taah enâmeh láá Island, Puola, Slovenia, Eestieennâm, Ukraina, Ruotâ (KAJ), Portugal, Taažâ, Belgia, Azerbaidžan, San Marino, Albania, Vuáládâhenâmeh, Kroatia já Kypros.
Nubbe semifiinaal tuálloo tuorâstuv 15. peeivi tijme 22. Taan eehid lávlu meid Suomâ ovdâsteijee Erika Vikman. Suu pitá nommâ lii Ich komme. Taan semifinalist láá fáárust 16 enâmid: Australia, Montenegro, Irland, Latvia, Armenia, Nuorttâriijkâ, Kreikka, Liettua, Malta, Georgia, Tanska, Tšekki, Luxemburg, Israel, Serbia já Suomâ. Erika Vikman pittá kulloo puoh majemužžân. Nube semifiinaal sämikielâg čielgim kávnoo tääbbin.
Stuorrâ fiinaal uárnejuvvoo lávvárduv 17. peeivi tijme 22. Fiinaal sämikielâg čielgiittâs kávnoo tääbbin.
Stuorrâ ruttâdeijee-enâmeh Ranska, Ovtâstum kunâgâskodde, Italia, Saksa já Espanja iä kištottâl ollágin semifinalist, pic toh láá njuolgist finalist. Taah enâmeh láá kuittâg fáárust semifinalijn: Italia, Espanja já Sveicci vuosmuu semifinalist já Ovtâstum kunâgâskodde, Ranska já Saksa nube semifinalist.
Suomâst lii taanihásii lávlumkištoost stuorrâ rooli. Erika Vikman já Ruotâ ovdâsteijee lasseen syemmilâš puovtâdeijee lii ráhtám Eestieennâm lavluu, já syemmiliih láá lamaš fáárust meid Nuorttâriijkâ já Kypros lavlui rähtimist.
Almoliih tiäđuh lávlumkištoost kávnojeh tääbbin. Taan liiŋkâst kávnojeh tiäđuh lávloin, lavluin já meiddei lávloi lávdástâllâmpihtâsijn. Yle siijđost láá tiäđuh lávlumkištoost suomâkielân.
Euroviisuh-lávlumkiišton láá vuolgâttum ovdâsteijeeh ohtsis 37 enâmist.
Anarâš aavis čuávu lávlumkišto.
Käldee:
– Näin seuraat ja äänestät Euroviisuissa 2025 (yle.fi)
Kove: Fabrizio Brecciaroli