Tanskalâš Jacob Friis lii Suomâ almai jyelgipállujuávhu uđđâ uáivivälmejeijee. 48-ihásâš Friis lii majemustáá toimâm Saksa Bundesliigast spellee FC Augsburg iševälmejeijen. Augsburg valastâllâmhovdâ Michael Ströll nonnij Friis sirdum Suomân saksalii Kicker-loostân.
Tanskalii valastâllâmmedia Tipsbladet mield Friis sopâmuš pištá ive 2028 räi. Talle spiällojeh jyelgipáálu almai EM-kištoh.
Friis lii ovdil toimâm Tanska uáiviliigast Aalborg FK já Viborg FF sehe Tanska vuálá 19-ihásij nisonij juávhu uáivivälmejeijen. Ton lasseen sun lii lamaš iševälmejeijen meksikolii Tigres de la UANL:st vuálá 20-ihásij almai ovdâstemjuávhust sehe tanskalii Hobro IK:st.
Ovdil Friis valjim Suomâ almai jyelgipállujuávhust ij lamaš uáivivälmejeijee moonnâm skammâmáánu loppâpele rääjist. Talle juávhu kuhesáigásâš uáivivälmejeijee Markku Kanerva celkkui luovâs virgestis. Kanerva tooimâi juávhu välmejeijen ive 2016 rääjist.
Suomâ almai jyelgipállujuávkku táppái moonnâm Aalmugij liigast puoh kuttâ speelâs já koočâi C-liigan. Moonnâm ive tot vuoitij tuše oovtâ speelâ, mii lâi njuhčâmáánu hárjuttâsspellâ Eestieennâm vuástá. Vuossâmuid speelâid uđđâ uáivivälmejeijein juávkku spiällá puáttee njuhčâmáánust Malta (21.3.) já Liettua (24.3.) vuástá.
Käldee:
– Nyt se on varmaa: Jacob Friis on Huuhkajien uusi päävalmentaja (yle.fi)
Kove: Alexander Fox | PlaNet Fox (Pixabay)