Romania majemuuh čevđiellei käärdih kiddejuvvojeh ive 2027 aalgâst, kuás čevđiellei kärdidemkiäldu puátá vuáimán.
Romania parlament jienâstij 22.10. miiŋkij já chinchillai kärdidemkiäldu peeleest jienâiguin 217–6. Tot meerhâš tom, ete čevđiellei kärdidem nohá Romaniast ollásávt. Kiäldu puátá vuáimán 1.1.2027. Kiäldu váátá vala president tuhhiittem, mut taat annoo tuše formaaliteetin. Romaniast láá vala love čevđiellei kärdid, main šoddâduvvojeh 100 000 miŋkkid já 15 000 chinchillad jyehi ive.
Parlamentaarliih savâstâlmeh čevđiellei kärdidmist láá pištám Romaniast muáddi ive. Ton ääigi elleevuoigâdvuotâornijdumeh láá vaiguttâm aktiivlávt toos, ete sehe Romania aalmug já eennâm politikkáreh ožžuu tiäđuid čevđiellei killáámušâin čevđikaardijn.
Meid eurooplâš ovdánem lâš vaiguttâm Romania miärádâsân, tastko eurooplâš Fur Free Europe -aalmugáánnum lii ovdánâm EU komission. Aalmugánumáin viggoo lopâttuđ čevđiellei kärdidem ubâ EU:st. Komissio lii lopedâm adeliđ lopâlii miärádâsâs ääšist ive 2026. Ton lasseen kieđâvušmist lii miiŋki lasanem EU vieresšlajâliiston, mii kiäldáččij miiŋkij šoddâdem ubâ EU:st. Suomâ áigu uuccâđ šoddâdemkiäldun spiekâstâhlove.
Talle ko laahâ lii nanodum, Romaniast šadda 22. Euroop eennâm já 20. EU eennâm, mii lii kiäldám čevđiellei kärdidem ollásávt tâi uásild. Čevđiellei kärdidemkiäldu lii eereeb iärrás Taažâst, Eestienâmist, Latviast, Stuorrâ-Britanniast, Irlandist, Ranskaast, Italiast, Vuáládâhenâmijn já Belgiast. Čevđielleeh iä kärdiduu innig maaŋgâ EU enâmist: miiŋkih kärdiduvvojeh Suomâ lasseen enâmustáá Puolast já Kreikkaast, já riemnjiskärdidem lii tuše Suomâst. Puola parlamentist lii eidu tääl čevđiellei kärdidemkiäldu kieđâvušmist. Meid Ruotâst lii valmâštuumin laahâ, mii kiäldáččij čevđiellei kärdidem ollásávt. Suomâ ovdâskoddeest vist kieđâvušmist lii paijeel 100 000 vuáláčálusid čoggum Čevđikäärdih historján -aalmuglâšáánnum, mon ulmen lii lopâttiđ čevđiellei kärdidem Suomâst.
Käldeeh:
– Voitto turkiseläimille! Romania kieltää turkistarhauksen (animaliamedia.fi)
– Romaniakin kieltää turkistarhauksen (www.verdelehti.fi)
– EU haluaa nimetä minkin vieraslajiksi, jota ei saisi kasvattaa – Suomi aikoo hakea tarhauksen jatkamiselle poikkeuslupaa (yle.fi)
Kove: Oikeutta eläimille (flickr)