Morgan-museo nurâlduvâin New Yorkist lii kavnum ovdil tubdâmettum valssânuotâstâs puolalii nyettejeijee Frédéric Chopinist (1810–1849). Ääšist muštâl The New York Times -aavis. Taat lii vuossâmuš kerdi masa čyeđe ihán, et uđđâ muusik Chopinist lii kavnum.
Uánihis vaalsâst ij lah vuáláčáálus, mut kietâčalluu pajeroobdân lii čallum Chopin nommâ. Äššitobdei mield kietâčaalâ lii tuođânálásávt Chopin kietâčaalâ, ko tom verdid nuottâkietâčálálduv eres Chopin kietâčalluid. Pajeroobdân čallum noomâ vist lii čáállám eres olmooš, arvâleh kietâčáláldâhäššitobdeeh. Meid pävirtutkâmuš čaaitij, ete sehe päävir já lekkâ láá tagareh, maid Chopin táválávt keevtij.
Valssâ lii A. Sherrill Whiton Jr nurâlduvâst. Whiton lâi New York School of Interior Design -opâttuv hovdâ, kiän puđâldâssáid kullii sehe pianočuojâttem já nuottim. Suu jäämmim maŋa ive 1972 suu kálgu vuobdij nurâlduv Arthur Satzân, kote testamentistij tom Morgan-museon.
Nurâldâh poođij museon jo ive 2019, mut tot šlajâttâlluuškuođij eskin vittâ ive maŋeláá. Kiđđuv 2024 kuraattor Robinson McClellan kaavnâi vaalsâ nurâlduv šlajâttâldijnis. Morgan-museo mield ovdil tubdâmettum Chopin muusikpitáh iä lah kavnum 1930-lovo loopâ maŋa.
Uánihis valssâ lii čallum uccâ nuottâpápárân. Chopin laavij kopijistiđ nuotâstâsâidis skeŋkkân lijkkuustâlleidis. Taat-uv kietâčaalâ sáttá leđe čallum siämmáásullâsii tárguttâsân, čáálá The New York Times.
Käldeeh:
– Tuntematon Chopinin valssi löytyi New Yorkista (www.hs.fi)
– Lost Chopin music unearthed nearly 200 years after composer’s death (edition.cnn.com)
Kove: images.fineartamerica.com (Wikimedia Commons)